قر ۇلتتىق بانكتىڭ تٶراعاسى تيمۋر سٷلەيمەنوۆ ارنايى بريفينگ بارىسىندا كەيبٸر كوممۋنالدىق تاريفتەردٸ ٶسٸرۋدٸ كەيٸنگە شەگەرۋ تۋرالى ٷكٸمەت شەشٸمٸن "دۇرىس ەرٸ ورىندى" دەپ باعالادى. ونىڭ ايتۋىنشا, باستاپقىدا تاريفتٸ كٶتەرۋ جايلى شەشٸم قابىلدانعاندا, ينفلياتسييالىق قىسىم دەل قازٸرگٸدەي جوعارى بولماعان. سول كەزدە سالىق رەفورماسىنا قاتىستى دا انىقتىق بولمادى, ال جاھاندىق ساۋدا جٷيەلەرٸنٸڭ تٷبەگەيلٸ ٶزگەرٸسكە ۇشىرايتىنىن ەشكٸم بولجاي العان جوق. سوندىقتان تاريف رەفورماسى تىم وپتيميستٸك جوسپارمەن جاسالعان, دەپ حابارلايدى Dalanews.kz.
قازٸر سول جوسپارلاردى قايتا قاراپ, قارقىندى بەسەڭدەتۋ – شىن مەنٸندە اقىلعا قونىمدى قادام.
"بٷگٸنگٸ تاريفتەر تەك تٸكەلەي ينفلياتسيياعا ەسەر ەتٸپ قانا قويماي, ەكٸنشٸ دەڭگەيلٸ تولقىندى دا قوزعايدى. ياعني, جارىق پەن جىلۋدىڭ قىمباتتاعاندا بيزنەس مۇنى تاۋارلارعا دەگەن ٶزٸندٸك قۇنىنا جٷكتەيدٸ, ول ٶز كەزەگٸندە تاۋارلار مەن قىزمەت باعاسىن دا كٶتەرە تٷسەدٸ. سوندىقتان تاريفتٸ ٶسٸرۋ شاراسىن كەيٸنگە شەگەرۋ – اقىلعا قونىمدى شەشٸم", – دەدٸ سٷلەيمەنوۆ.
ونىڭ ايتۋىنشا, رەتتەلەتٸن قىزمەتتەر ٶسٸمٸنٸڭ ينفلياتسيياداعى ٷلەسٸ ٷكٸمەت جوسپارىنا سەيكەس 1,32% دەڭگەيٸندە بولۋى تيٸس. ياعني, ينفلياتسييانىڭ جالپى كٶرسەتكٸشٸندەگٸ 1,32% تابيعي مونوپولييا تاريفتەرٸنٸڭ ٷلەسٸنە تيەسٸلٸ. ەندٸ ولار بۇل كٶلەمدٸ 0,8%-عا تٶمەندەتۋ تۋرالى شەشٸم قابىلدادى, ياعني جارتى پايىزعا. بۇل - تٸكەلەي ەسەردٸڭ ٶزٸ عانا.
سونىمەن قاتار ول قازاقستاندا رەتتەلەتٸن قىزمەتتەردٸڭ باعاسى كٶبٸنە ينفلياتسييا قارقىنىنان تٶمەن بولۋعا تيٸس ەكەنٸن ەسكە سالادى.
"ەگەر كەرٸسٸنشە بولسا, مۇنداي تاريفتەر تۇراقتى ينفلياتسييالىق فاكتورعا اينالىپ كەتۋٸ مٷمكٸن. ال ٷكٸمەتتٸڭ سوڭعى شەشٸمٸ, كەرٸسٸنشە – دەزينفلياتسييالىق قىسىم تۋدىرادى. بۇل – باعانىڭ تٶمەندەۋٸنە جول اشاتىن بەلگٸ. ياعني, بۇدان كەيٸن باعالار تٶمەندەۋٸ كەرەك", - دەيدٸ ول.
ايتا كەتەيٸك, بۇعان دەيٸن سٷلەيمەنوۆ ينفلياتسييا بويىنشا بولجامدى قايتا-قايتا ٶزگەرتۋگە بولمايتىنىن ايتىپ, ۇلتتىق بانك ۇستاناتىن ينفلياتسييالىق مەجەنٸڭ – 5% ەكەنٸن ەسكەرتكەن.
