Ulttyq bank bank kartalary arqyly jasalatyn jańa alaiaqtyq shemasyn eskertti, dep habarlaidy Dalanews.kz.
Ulttyq bank málimetinshe, shema bylai júzege asady:
- Qaskóiler ashyq derekkózden (fishing saittar men qoǵamdyq oryndardaǵy saýalnamalardan, áleýmettik jeliler men marketpleisten) alynǵan azamattardyń jeke deregin qoldanyp, qarjy uiymdarynyń bailanys ortalyǵyna klient atynan júginedi. Iaǵni olar bank kartasy joǵalǵanyn aityp, jalǵan habardyń kúshimen tólem kartasy buǵattalýyna sebep bolady.
- Keiin alaiaqtar azamattarǵa qońyraý shalyp, ózin banktiń nemese quqyq qorǵaý organynyń qaýipsizdik qyzmeti ókili dep tanystyrady. Sóitip "kartany buǵattan shyǵaramyz" nemese "qaýipsiz shotqa aqsha aýdaramyz" degen jeleýmen azamattyń shotyna qol jetkizýge múmkindik beretin SMS kod, internet bankingke arnalǵan qupiiasóz, CVV/CVC kod sekildi derekterdi alýǵa tyrysady.
- Sondai-aq, bankomat mańyn torýyldap júretin qaskóiler de kezdesedi, olar "kartam buǵattalyp qaldy", "kartamdy zaqymdap aldym" nemese "aqsha alatyn limit taýsyldy" degen túrli syltaýmen basqa bir adamnyń shotyna aqsha aýdarýǵa kómek surap, ornyna aqshalai syiaqy ýáde etedi. Mundai aýdarymdar zańǵa qaishy áreket sanalyp, dropperlik retinde qabyldanýy múmkin.
"Tólem kartasy buǵattalǵan jaǵdaida kartanyń ekinshi betinde nemese mobildi qosymshada kórsetilgen nómir arqyly banktiń resmi koll ortalyǵyna habarlasqan durys. Esińizde bolsyn, qarjy uiymdarynyń qyzmetkerleri SMS- abarlamada kórsetilgen kodty eshqashan suramaidy jáne mobildi qurylǵyny qashyqtan basqaratyn qosymshalardy ornatýdy talap etpeidi", - dep eskertti Ulttyq bank ókilderi.
