Keńeıtilgen Úkimet otyrysynda Prezıdent Qasym-Jomart Toqaev ınflásıanyń qashan bir tańbaly deńgeıge túsetinin naqtylady. Bul saýalǵa jaýap bergen Ulttyq bank tóraǵasy Tımýr Súleımenov 2026 jylǵa arnalǵan boljamdy bólisti, dep habarlaıdy Dalanews.kz.
Onyń málimetinshe, álemdik ekonomıkadaǵy turaqsyzdyq pen ishki naryqtaǵy úrdisterdi eskergende, bıyl ınflásıa 9–12% aralyǵynda bolýy múmkin. Soǵan qaramastan, Ulttyq bank pen Úkimettiń negizgi mindeti – jyl qorytyndysy boıynsha ınflásıany 10%-dan tómen túsirý.
"Bıyl ınflásıany múmkindiginshe 9% jáne odan da tómen deńgeıge jetkizýge kúsh salamyz", – dedi Ulttyq bank basshysy.
Osylaısha, qarjy retteýshisi 2026 jyly baǵa ósimin baqylaýda ustap, ınflásıany bir tańbaly kórsetkishke jaqyndatýdy basty basymdyqtardyń biri retinde qarastyryp otyrǵanyn jetkizdi.
