Jiyn basynda jobany júzege asyrý barysy týraly prezentatsiiamen «Alsim Arko» AQ kontsessioner kompaniiasynyń vitse-prezidenti Abbas Shahin tanystyrdy.
Saltanatty jiynda Úkimet basshysynyń birinshi orynbasary Asqar Mamin jobanyń mańyzdylyǵyna airyqsha toqtalyp ótti.
– Úlken Almaty ainalma avtokólik jolynyń qurylysy – «Nurly jol» baǵdarlamasynyń aiasynda júzege asyrylyp jatqan irgeli joba. Ony júzege asyrý Qazaqstan ekonomikasy úshin mańyzdy oqiǵa bolmaq. Bul memlekettik-jekemenshik seriktestik mehanizmin qoldaný arqyly infraqurylymdy damytýdyń alǵashqy iri jobasy, ony júzege asyrýǵa iri halyqaralyq kompaniialar qatysady. Jobanyń quny – 180 mlrd teńgege jýyq. Tórt jyldan keiin tolyq iske qosylady dep josparlanǵan. Búgin biz ÚAAAJ qurylysyn bastap otyrmyz. Barshańyzdy osy qýanyshty jańalyqpen quttyqtaimyn, – dedi birinshi vitse-premer.
Óz kezeginde Almaty oblysynyń ákimi Amandyq Batalov ÚAAAJ qurylysynyń oblys ekonomikasyn damytýdaǵy mańyzyna toqtaldy. Bul mańyzdy avtokólik joly oblystyń úsh aýdanynyń – Qarasai, Ile, Talǵar aýdandarynyń aýmaǵyn basyp ótedi.
– Búgin biz Elbasynyń tikelei tapsyrmasymen asa iri jobany bastap otyrmyz. Bul jobanyń Almaty oblysy úshin de mańyzy zor. Elbasy saiasatynyń arqasynda jáne «Nurly jol» baǵdarlamasynyń nátijesinde oblys aýmaǵynda «Batys Eýropa – Batys Qytai», «Almaty – Taldyqorǵan» siiaqty halyqaralyq standarttaǵy iri avtokólik joldary salyndy, ÚAAAJ osy kólik dálizderiniń jalǵasy bolmaq. Ainalma avtojoly aiaqtalǵannan keiin bul óz kezeginde oblystaǵy shaǵyn jáne orta biznestiń, jol boiyndaǵy qyzmet kórsetý men kólik-qoima terminaldarynyń damýyna áser etip, mýltiplikativti tiimdiligin kórsetetin bolady. Sonymen qatar ónerkásip oryndary úshin naryqqa jol ashýǵa múmkindik jasaidy, – dedi A.Batalov.
Sondai-aq oblys basshysy atap ótkendei, qurylys kezinde 3 myńnan astam jumys orny qurylyp, onyń 90 %-in jergilikti turǵyndar quraityn bolady. Al qurylysy aiaqtalǵannan keiin 2 myńǵa jýyq turaqty jumys orny ashylady. Jalpy, 300 mlrd teńgege jýyq investitsiia tartý kózdelgen. Jobany júzege asyrý úshin oblys ákimdigi tarapynan barlyq tiisti sharalar qabyldanǵan: qajetti jer ýchaskeleri der kezinde bosatyldy, vahtalyq qalashyqtardy, beton jáne asfalt zaýyttaryn ornalastyrý men olardy barlyq kommýnikatsiia júielerine qosý, qazý oryndaryn belgileý máseleleri sheshildi.
Sóziniń qorytyndysynda Amandyq Batalov oblys ákimdigi qurylystyń sapaly jáne merziminde talqylanýyna barynsha qoldaý kórsetetinin jetkizdi.
Atap ótsek, Úkimet basshysynyń birinshi orynbasary Asqar Mamin Talǵar qalasynda «Amal Bio» JShS bazasynda ótken jiynǵa qatysty.
Baljan Qairatqyzy, Almaty oblysy.
