جيىن باسىندا جوبانى جۇزەگە اسىرۋ بارىسى تۋرالى پرەزەنتاسيامەن «السيم اركو» اق كونسەسسيونەر كومپانياسىنىڭ ۆيسە-پرەزيدەنتى ابباس شاحين تانىستىردى.
سالتاناتتى جيىندا ۇكىمەت باسشىسىنىڭ ءبىرىنشى ورىنباسارى اسقار مامين جوبانىڭ ماڭىزدىلىعىنا ايرىقشا توقتالىپ ءوتتى.
– ۇلكەن الماتى اينالما اۆتوكولىك جولىنىڭ قۇرىلىسى – «نۇرلى جول» باعدارلاماسىنىڭ اياسىندا جۇزەگە اسىرىلىپ جاتقان ىرگەلى جوبا. ونى جۇزەگە اسىرۋ قازاقستان ەكونوميكاسى ءۇشىن ماڭىزدى وقيعا بولماق. بۇل مەملەكەتتىك-جەكەمەنشىك سەرىكتەستىك مەحانيزمىن قولدانۋ ارقىلى ينفراقۇرىلىمدى دامىتۋدىڭ العاشقى ءىرى جوباسى، ونى جۇزەگە اسىرۋعا ءىرى حالىقارالىق كومپانيالار قاتىسادى. جوبانىڭ قۇنى – 180 ملرد تەڭگەگە جۋىق. ءتورت جىلدان كەيىن تولىق ىسكە قوسىلادى دەپ جوسپارلانعان. بۇگىن ءبىز ءۇاااج قۇرىلىسىن باستاپ وتىرمىز. بارشاڭىزدى وسى قۋانىشتى جاڭالىقپەن قۇتتىقتايمىن، – دەدى ءبىرىنشى ۆيسە-پرەمەر.
ءوز كەزەگىندە الماتى وبلىسىنىڭ اكىمى اماندىق باتالوۆ ءۇاااج قۇرىلىسىنىڭ وبلىس ەكونوميكاسىن دامىتۋداعى ماڭىزىنا توقتالدى. بۇل ماڭىزدى اۆتوكولىك جولى وبلىستىڭ ءۇش اۋدانىنىڭ – قاراساي، ىلە، تالعار اۋداندارىنىڭ اۋماعىن باسىپ وتەدى.
– بۇگىن ءبىز ەلباسىنىڭ تىكەلەي تاپسىرماسىمەن اسا ءىرى جوبانى باستاپ وتىرمىز. بۇل جوبانىڭ الماتى وبلىسى ءۇشىن دە ماڭىزى زور. ەلباسى ساياساتىنىڭ ارقاسىندا جانە «نۇرلى جول» باعدارلاماسىنىڭ ناتيجەسىندە وبلىس اۋماعىندا «باتىس ەۋروپا – باتىس جۇڭگو»، «الماتى – تالدىقورعان» سياقتى حالىقارالىق ستاندارتتاعى ءىرى اۆتوكولىك جولدارى سالىندى، ءۇاااج وسى كولىك دالىزدەرىنىڭ جالعاسى بولماق. اينالما اۆتوجولى اياقتالعاننان كەيىن بۇل ءوز كەزەگىندە وبلىستاعى شاعىن جانە ورتا بيزنەستىڭ، جول بويىنداعى قىزمەت كورسەتۋ مەن كولىك-قويما تەرمينالدارىنىڭ دامۋىنا اسەر ەتىپ، مۋلتيپليكاتيۆتى تيىمدىلىگىن كورسەتەتىن بولادى. سونىمەن قاتار ونەركاسىپ ورىندارى ءۇشىن نارىققا جول اشۋعا مۇمكىندىك جاسايدى، – دەدى ا.باتالوۆ.
سونداي-اق وبلىس باسشىسى اتاپ وتكەندەي، قۇرىلىس كەزىندە 3 مىڭنان استام جۇمىس ورنى قۇرىلىپ، ونىڭ 90 %ء-ىن جەرگىلىكتى تۇرعىندار قۇرايتىن بولادى. ال قۇرىلىسى اياقتالعاننان كەيىن 2 مىڭعا جۋىق تۇراقتى جۇمىس ورنى اشىلادى. جالپى، 300 ملرد تەڭگەگە جۋىق ينۆەستيسيا تارتۋ كوزدەلگەن. جوبانى جۇزەگە اسىرۋ ءۇشىن وبلىس اكىمدىگى تاراپىنان بارلىق ءتيىستى شارالار قابىلدانعان: قاجەتتى جەر ۋچاسكەلەرى دەر كەزىندە بوساتىلدى، ۆاحتالىق قالاشىقتاردى، بەتون جانە اسفالت زاۋىتتارىن ورنالاستىرۋ مەن ولاردى بارلىق كوممۋنيكاسيا جۇيەلەرىنە قوسۋ، قازۋ ورىندارىن بەلگىلەۋ ماسەلەلەرى شەشىلدى.
ءسوزىنىڭ قورىتىندىسىندا اماندىق باتالوۆ وبلىس اكىمدىگى قۇرىلىستىڭ ساپالى جانە مەرزىمىندە تالقىلانۋىنا بارىنشا قولداۋ كورسەتەتىنىن جەتكىزدى.
اتاپ وتسەك، ۇكىمەت باسشىسىنىڭ ءبىرىنشى ورىنباسارى اسقار مامين تالعار قالاسىندا «Amal Bio» ج ش س بازاسىندا وتكەن جيىنعا قاتىستى.
بالجان قايرات قىزى، الماتى وبلىسى.
