Ulynan aiyrylǵan Daniiar Talipov emge jinalǵan aqshany basqa naýqas balalarǵa aýdarǵan, dep habarlaidy Dalanews.kz.
Daniiar Talipov uly Altair Erkebulan qaitys bolǵannan keiin jeti kún ótken soń kópshilikke ún qatyp, qoǵamda keń rezonans týdyrǵan sheshim qabyldaǵanyn málimdedi.
Altairdiń emine jinalǵan, paidalanylmai qalǵan barlyq qarajat otbasynyń sheshimimen shuǵyl emdeýdi qajet etip otyrǵan ózge balalarǵa baǵyttalǵan. Bul týraly Daniiar Instagram paraqshasynda jariialaǵan beineúndeýinde aitty.
Áńgime beijai qaramaǵan jandar balanyń ómiri úshin kúreske jinaǵan 96 million teńge týraly bolyp otyr. Ulynan aiyrylǵannan keiin otbasy bul qarajatty qazir de qaiyrymdylyq kómegine muqtaj balalardyń arasynda bólip berýdi uiǵarǵan.
«Onyń aramyzdan ketkenine jeti kún ótti. Altairdiń emine jinalǵan 96 million teńge qarajat qaldy. Biz bul somany qazir kómekke muqtaj balalardyń arasynda bólýdi jón kórdik», – dedi Daniiar Talipov.
Onyń aitýynsha, eń iri somany Aiana Nurtaevaǵa aýdarylǵan.
«Aiana Nurtaevaǵa 45 million teńge jiberdik. Ol qazir Ystambulda em qabyldap jatyr», – dedi ol.
Taǵy 25 million teńge Almaz Túsipbektiń emine baǵyttalǵan.
«Almazǵa da 25 million teńge aýdardyq. Qarajattyń taǵy bir bóligi Daria esimdi balaǵa jiberildi – olar da qazir em alyp jatyr», – dep naqtylady Daniiar.
Ol kómek alǵan ózge balalardyń da qazirgi ýaqytta klinikalarda emin jalǵastyryp jatqanyn qosty.
Beineúndeýinde Daniiar Talipov otbasy úshin eń aýyr kezeńde qoldaý bildirgen barsha janǵa alǵysyn aitty.
«Dostar, qoldaýlaryńyz úshin – qarjylai kómekterińizge, janashyrlyqtaryńyzǵa, pikirlerińizge – barshańyzǵa úlken raqmet. Bul biz úshin óte mańyzdy boldy», – dedi ol.
Sondai-aq ol qiyn sátte kómek kórsetken bankke jáne jekelegen adamdarǵa arnaiy alǵys bildirdi.
Ol úndeýin otbasynyń janynan tabylǵan barsha adamǵa alǵys aityp, barlyǵyna jaqsylyq tileýmen aiaqtady.
