ۇلىنان ايىرىلعان دانيار تاليپوۆ ەمگە جينالعان اقشانى باسقا ناۋقاس بالالارعا اۋدارعان، دەپ حابارلايدى Dalanews.kz.

دانيار تاليپوۆ ۇلى التاير ەركەبۇلان قايتىس بولعاننان كەيىن جەتى كۇن وتكەن سوڭ كوپشىلىككە ءۇن قاتىپ، قوعامدا كەڭ رەزونانس تۋدىرعان شەشىم قابىلداعانىن مالىمدەدى.

ءالتايردىڭ ەمىنە جينالعان، پايدالانىلماي قالعان بارلىق قاراجات وتباسىنىڭ شەشىمىمەن شۇعىل ەمدەۋدى قاجەت ەتىپ وتىرعان وزگە بالالارعا باعىتتالعان. بۇل تۋرالى دانيار Instagram پاراقشاسىندا جاريالاعان بەينەۇندەۋىندە ايتتى.

اڭگىمە بەيجاي قاراماعان جاندار بالانىڭ ءومىرى ءۇشىن كۇرەسكە جيناعان 96 ميلليون تەڭگە تۋرالى بولىپ وتىر. ۇلىنان ايىرىلعاننان كەيىن وتباسى بۇل قاراجاتتى ءقازىر دە قايىرىمدىلىق كومەگىنە مۇقتاج بالالاردىڭ اراسىندا ءبولىپ بەرۋدى ۇيعارعان.

«ونىڭ ارامىزدان كەتكەنىنە جەتى كۇن ءوتتى. ءالتايردىڭ ەمىنە جينالعان 96 ميلليون تەڭگە قاراجات قالدى. ءبىز بۇل سومانى ءقازىر كومەككە مۇقتاج بالالاردىڭ اراسىندا ءبولۋدى ءجون كوردىك»، – دەدى دانيار تاليپوۆ.

ونىڭ ايتۋىنشا، ەڭ ءىرى سومانى ايانا نۇرتايەۆاعا اۋدارىلعان.

«ايانا نۇرتايەۆاعا 45 ميلليون تەڭگە جىبەردىك. ول ءقازىر ىستامبۇلدا ەم قابىلداپ جاتىر»، – دەدى ول.

تاعى 25 ميلليون تەڭگە الماز تۇسىپبەكءتىڭ ەمىنە باعىتتالعان.

«المازعا دا 25 ميلليون تەڭگە اۋداردىق. قاراجاتتىڭ تاعى ءبىر بولىگى داريا ەسىمدى بالاعا جىبەرىلدى – ولار دا ءقازىر ەم الىپ جاتىر»، – دەپ ناقتىلادى دانيار.

ول كومەك العان وزگە بالالاردىڭ دا قازىرگى ۋاقىتتا كلينيكالاردا ەمىن جالعاستىرىپ جاتقانىن قوستى.

بەينەۇندەۋىندە دانيار تاليپوۆ وتباسى ءۇشىن ەڭ اۋىر كەزەڭدە قولداۋ بىلدىرگەن بارشا جانعا العىسىن ايتتى.

«دوستار، قولداۋلارىڭىز ءۇشىن – قارجىلاي كومەكتەرىڭىزگە، جاناشىرلىقتارىڭىزعا، پىكىرلەرىڭىزگە – بارشاڭىزعا ۇلكەن راقمەت. بۇل ءبىز ءۇشىن وتە ماڭىزدى بولدى»، – دەدى ول.

سونداي-اق ول قيىن ساتتە كومەك كورسەتكەن بانككە جانە جەكەلەگەن ادامدارعا ارنايى العىس ءبىلدىردى.

ول ۇندەۋىن وتباسىنىڭ جانىنان تابىلعان بارشا ادامعا العىس ايتىپ، بارلىعىنا جاقسىلىق تىلەۋمەن اياقتادى.