Túrkistan oblysynyń ákimi Nuralhan Kósherov Ordabasy aýdanynda turatyn Uly Otan soǵysynyń ardageri Qalmen Muratovtyń shańyraǵyna arnaiy baryp, merekemen quttyqtady. Sonymen qatar QR Prezidenti Qasym-Jomart Toqaevtyń joldaǵan quttyqtaý haty men «Uly Otan soǵysyndaǵy Jeńiske 80 jyl» biryńǵai merekelik medalin tabystady,- dep habarlaidy Dalanews.kz
101 jastaǵy soǵys maidangerimen áńgimelesý barysynda ákim beibit ómir úshin urpaqtyń baqytty bolashaǵy úshin otqa túsip, qaiǵy-qasiret shekken, sonyń bárin qaiyspai jeńe bilgen ardagerlerdiń jankeshti erligi men eńbegi eshqashan umytylmaitynyn atap ótti. Ardagerge uzaq ǵumyr tilep, syi-syiapat jasady.
1924 jyly dúniege kelgen Qalmen Muratov 1942 jyly 1 tamyzda ásker qataryna shaqyrylyp, Kalinin oblysyndaǵy shaiqastarǵa, Belarýs maidanynyń quramynda shaiqastarǵa qatysqan. «Qurmet belgisi», «I dárejeli Otan soǵysy» ordenderimen, «1941-1945 jyldardaǵy UOS Germaniiany jeńgeni úshin», «Eńbek ardageri» jáne de basqa da kóptegen mereitoilyq madeldarmen marapattalǵan.
1947 jyly Bórjar aýylynda «Stalin» kolhozynyń brigadiri bolyp, 1973 jyldan bastap temirjolda jumys istedi. Ol «Kommýnistik eńbektiń ekpindisi», «Onynshy besjyldyqtyń soqqysy», «Sotsialistik jarystyń jeńimpazy» boldy. Qazirgi tańda 6 ul men 2 qyzdan 31 nemere men 34 shóbere kórip otyrǵan baqytty ardager.
Túrkistan oblysynda Jeńistiń 80 jyldyǵyna orai UOS ardagerlerine 5 mln. teńge kóleminde birjolǵy qarjylai kómek kórsetildi. Sonymen qatar tyl eńbekkerleri jáne jeńiske úles qosqan basqa sanattardaǵy azamattarǵa 50-100 myń teńge aralyǵynda berildi. Jalpy Túrkistan oblysynda Uly Otan soǵysyna qatysýshylar men olarǵa teńestirilgen 3 017 adamǵa birjolǵy aqshalai áleýmettik kómek kórsetý úshin aýdan-qala biýdjeti esebinen qarjy qaralǵan.
Óńirden Uly Otan soǵysyna 140 myńnan astam azamat attandy. Búgingi tańda oblys kóleminde 8 UOS ardageri bar. Olarǵa tek mereke qarsańynda ǵana emes, jyl kóleminde túrli kómek kórsetilip, birqatar jeńildikter qarastyrylǵan.
Aita keterligi, Túrkistan oblysy boiynsha Uly Otan soǵysyń ardagerleri men Jeńiske qosqan eleýli úlesi bar 3008 azamatqa «Uly Otan soǵysyndaǵy Jeńiske 80 jyl» mereitoilyq medaldar tabystalsa, 8 soǵys ardagerine Memleket basshysynyń atynan arnaiy quttyqtaý adresaty tapsyrylyp, UOS ardagerleri men olardyń otbasy múshelerimen jeke kezdesýler ótkiziletin bolady.
