تۇركىستان وبلىسىنىڭ اكىمى نۇرالحان كوشەروۆ ورداباسى اۋدانىندا تۇراتىن ۇلى وتان سوعىسىنىڭ ارداگەرى قالمەن مۇراتوۆتىڭ شاڭىراعىنا ارنايى بارىپ، مەرەكەمەن قۇتتىقتادى. سونىمەن قاتار ق ر پرەزيدەنتى قاسىم-جومارت توقايەۆتىڭ جولداعان قۇتتىقتاۋ حاتى مەن «ۇلى وتان سوعىسىنداعى جەڭىسكە 80 جىل» ءبىرىڭعاي مەرەكەلىك مەدالىن تابىستادى،- دەپ حابارلايدى Dalanews.kz
101 جاستاعى سوعىس مايدانگەرىمەن اڭگىمەلەسۋ بارىسىندا اكىم بەيبىت ءومىر ءۇشىن ۇرپاقتىڭ باقىتتى بولاشاعى ءۇشىن وتقا ءتۇسىپ، قايعى-قاسىرەت شەككەن، سونىڭ ءبارىن قايىسپاي جەڭە بىلگەن ارداگەرلەردىڭ جانكەشتى ەرلىگى مەن ەڭبەگى ەشقاشان ۇمىتىلمايتىنىن اتاپ ءوتتى. ارداگەرگە ۇزاق عۇمىر تىلەپ، سىي-سىياپات جاسادى.
1924 جىلى دۇنيەگە كەلگەن قالمەن مۇراتوۆ 1942 جىلى 1 تامىزدا اسكەر قاتارىنا شاقىرىلىپ، كالينين وبلىسىنداعى شايقاستارعا، بەلارۋس مايدانىنىڭ قۇرامىندا شايقاستارعا قاتىسقان. «قۇرمەت بەلگىسى»، «ءى دارەجەلى وتان سوعىسى» وردەندەرىمەن، «1941-1945 جىلدارداعى ۇوس گەرمانيانى جەڭگەنى ءۇشىن»، «ەڭبەك ارداگەرى» جانە دە باسقا دا كوپتەگەن مەرەيتويلىق مادەلدارمەن ماراپاتتالعان.
1947 جىلى ءبورجار اۋىلىندا «ستالين» كولحوزىنىڭ بريگاديرى بولىپ، 1973 جىلدان باستاپ تەمىرجولدا جۇمىس ىستەدى. ول «كوممۋنيستىك ەڭبەكتىڭ ەكپىندىسى»، «ونىنشى بەسجىلدىقتىڭ سوققىسى»، «سوسياليستىك جارىستىڭ جەڭىمپازى» بولدى. قازىرگى تاڭدا 6 ۇل مەن 2 قىزدان 31 نەمەرە مەن 34 شوبەرە كورىپ وتىرعان باقىتتى ارداگەر.
تۇركىستان وبلىسىندا جەڭىستىڭ 80 جىلدىعىنا وراي ۇوس ارداگەرلەرىنە 5 ملن. تەڭگە كولەمىندە ءبىرجولعى قارجىلاي كومەك كورسەتىلدى. سونىمەن قاتار تىل ەڭبەككەرلەرى جانە جەڭىسكە ۇلەس قوسقان باسقا ساناتتارداعى ازاماتتارعا 50-100 مىڭ تەڭگە ارالىعىندا بەرىلدى. جالپى تۇركىستان وبلىسىندا ۇلى وتان سوعىسىنا قاتىسۋشىلار مەن ولارعا تەڭەستىرىلگەن 3 017 ادامعا ءبىرجولعى اقشالاي الەۋمەتتىك كومەك كورسەتۋ ءۇشىن اۋدان-قالا بيۋدجەتى ەسەبىنەن قارجى قارالعان.
وڭىردەن ۇلى وتان سوعىسىنا 140 مىڭنان استام ازامات اتتاندى. بۇگىنگى تاڭدا وبلىس كولەمىندە 8 ۇوس ارداگەرى بار. ولارعا تەك مەرەكە قارساڭىندا عانا ەمەس، جىل كولەمىندە ءتۇرلى كومەك كورسەتىلىپ، ءبىرقاتار جەڭىلدىكتەر قاراستىرىلعان.
ايتا كەتەرلىگى، تۇركىستان وبلىسى بويىنشا ۇلى وتان سوعىسىڭ ارداگەرلەرى مەن جەڭىسكە قوسقان ەلەۋلى ۇلەسى بار 3008 ازاماتقا «ۇلى وتان سوعىسىنداعى جەڭىسكە 80 جىل» مەرەيتويلىق مەدالدار تابىستالسا، 8 سوعىس ارداگەرىنە مەملەكەت باسشىسىنىڭ اتىنان ارنايى قۇتتىقتاۋ ادرەساتى تاپسىرىلىپ، ۇوس ارداگەرلەرى مەن ولاردىڭ وتباسى مۇشەلەرىمەن جەكە كەزدەسۋلەر وتكىزىلەتىن بولادى.
