Búgin 1 shilde kúni Taldyqorǵan qalasynyń ortalyq alańynda Ulttyq dombyra kúnine arnalǵan «Uly dala úni» atty keń aýqymdy oblystyq merekelik fleshmob uıymdastyryldy. Atalǵan shara – halqymyzdyń tól ónerin dáripteıtin, mádenı sabaqtastyqty nasıhattaıtyn mańyzdy mádenı oqıǵa boldy, - dep habarlaıdy Dalanews.kz

Bul tarıhı sátte 5000 adam – kásibı mýzykanttar, mektep oqýshylary, stýdentter, óner súıer qaýym – bir mezette qos kúıdi oryndap, el tarıhynda buryn-sońdy bolmaǵan rekordqa qol jetkizdi. Atalǵan jetistik Qazaqstan rekordtar kitabynyń bas redaktory Qaırat Tazabekovtyń qatysýymen resmı túrde tirkelip, jańa rekordty rastaıtyn sertıfıkat Jetisý oblysynyń ákimdigine tabystaldy. Bul – tek Jetisý óńiriniń ǵana emes, kúlli Qazaqstannyń mádenı ómirindegi eleýli oqıǵa retinde baǵalandy.

Fleshmobqa oblystyń barlyq aýdandary, oblystyq basqarmalar men uıymdardan kelgen qatysýshylar belsene qatysyp, ulttyq ónerge degen shynaıy qurmetterin bildirdi. Sonymen qatar Jetisý óńiriniń tabıǵı-tarıhı kórneki jerlerinde 7 kúıshi oryndaǵan «Baqtybaıdyń áýeni» kúıi arnaıy beınebaıanǵa túsirilip, fleshmobpen biriktirilgen mýzykalyq-vızýaldy klıp retinde jurt nazaryna usynyldy. Bul joba – dástúr men zamanaýı ónerdiń úndesýiniń jarqyn úlgisine aınaldy.

Shara aıasynda qazaqtyń jyrshylyq-termeshilik dástúriniń kórnekti ókili Baqtybaı Jolbarysulynyń 190 jyldyq mereıtoıyna oraı «Baqtybaıdyń áýeni» jáne tanymal kúıshi-kompozıtor Ábdimomyn Jeldibaıdyń «Erke sylqym» kúıleri oryndaldy.

Uıymdastyrýshylardyń aıtýynsha, bul shara tek mereke emes, urpaqtar arasyndaǵy mádenı sabaqtastyqty nyǵaıtyp, jastardyń ulttyq ónerge degen qurmetin arttyrýǵa baǵyttalǵan. Osyndaı mazmundy bastamalar arqyly kúı óneri men dombyra dástúri keńinen nasıhattalyp, «Uly dala úni» fleshmoby ulttyq qundylyqtardy ulyqtaǵan aıtýly oqıǵa retinde el esinde qaldy.