بۇگىن 1 شىلدە كۇنى تالدىقورعان قالاسىنىڭ ورتالىق الاڭىندا ۇلتتىق دومبىرا كۇنىنە ارنالعان «ۇلى دالا ءۇنى» اتتى كەڭ اۋقىمدى وبلىستىق مەرەكەلىك فلەشموب ۇيىمداستىرىلدى. اتالعان شارا – حالقىمىزدىڭ ءتول ونەرىن دارىپتەيتىن، مادەني ساباقتاستىقتى ناسيحاتتايتىن ماڭىزدى مادەني وقيعا بولدى، - دەپ حابارلايدى Dalanews.kz
بۇل تاريحي ساتتە 5000 ادام – كاسىبي مۋزىكانتتار، مەكتەپ وقۋشىلارى، ستۋدەنتتەر، ونەر سۇيەر قاۋىم – ءبىر مەزەتتە قوس كۇيدى ورىنداپ، ەل تاريحىندا بۇرىن-سوڭدى بولماعان رەكوردقا قول جەتكىزدى. اتالعان جەتىستىك قازاقستان رەكوردتار كىتابىنىڭ باس رەداكتورى قايرات تازابەكوۆتىڭ قاتىسۋىمەن رەسمي تۇردە تىركەلىپ، جاڭا رەكوردتى راستايتىن سەرتيفيكات جەتىسۋ وبلىسىنىڭ اكىمدىگىنە تابىستالدى. بۇل – تەك جەتىسۋ ءوڭىرىنىڭ عانا ەمەس، كۇللى قازاقستاننىڭ مادەني ومىرىندەگى ەلەۋلى وقيعا رەتىندە باعالاندى.
فلەشموبقا وبلىستىڭ بارلىق اۋداندارى، وبلىستىق باسقارمالار مەن ۇيىمداردان كەلگەن قاتىسۋشىلار بەلسەنە قاتىسىپ، ۇلتتىق ونەرگە دەگەن شىنايى قۇرمەتتەرىن ءبىلدىردى. سونىمەن قاتار جەتىسۋ ءوڭىرىنىڭ تابيعي-تاريحي كورنەكى جەرلەرىندە 7 كۇيشى ورىنداعان «باقتىبايدىڭ اۋەنى» كۇيى ارنايى بەينەبايانعا ءتۇسىرىلىپ، فلەشموبپەن بىرىكتىرىلگەن مۋزىكالىق-ۆيزۋالدى كليپ رەتىندە جۇرت نازارىنا ۇسىنىلدى. بۇل جوبا – ءداستۇر مەن زاماناۋي ونەردىڭ ۇندەسۋىنىڭ جارقىن ۇلگىسىنە اينالدى.
شارا اياسىندا قازاقتىڭ جىرشىلىق-تەرمەشىلىك ءداستۇرىنىڭ كورنەكتى وكىلى باقتىباي جولبارىس ۇلىنىڭ 190 جىلدىق مەرەيتويىنا وراي «باقتىبايدىڭ اۋەنى» جانە تانىمال كۇيشى-كومپوزيتور ءابدىمومىن جەلدىبايدىڭ «ەركە سىلقىم» كۇيلەرى ورىندالدى.
ۇيىمداستىرۋشىلاردىڭ ايتۋىنشا، بۇل شارا تەك مەرەكە ەمەس، ۇرپاقتار اراسىنداعى مادەني ساباقتاستىقتى نىعايتىپ، جاستاردىڭ ۇلتتىق ونەرگە دەگەن قۇرمەتىن ارتتىرۋعا باعىتتالعان. وسىنداي مازمۇندى باستامالار ارقىلى كۇي ونەرى مەن دومبىرا ءداستۇرى كەڭىنەن ناسيحاتتالىپ، «ۇلى دالا ءۇنى» فلەشموبى ۇلتتىق قۇندىلىقتاردى ۇلىقتاعان ايتۋلى وقيعا رەتىندە ەل ەسىندە قالدى.
