Marqum Aleksandr Mashkevichtiń úlesi men Shodievtiń Ibragimovtermen kúresine qatysty 19 qyrkúiekke josparlanǵan Eýraziialyq qarjylyq kompaniiasy aktsionerleriniń jinalysyn sot boldyrmai tastady, dep habarlaidy Dalanews.kz "Rýchnaia ekonomika" Telegram arnasyna silteme jasap.
Derekkózdiń habarlaýynsha, jinalysty ótkizýge kompaniianyń 33% aktsiiasyna ielik etetin Patoh Shodiev basshylyq etken. Alaida máselege sot aralasyp, bul jiyn ótpei qalǵan.
Direktorlar keńesi 30 shildede kezekti jinalysty qyrkúiekte ótkizýdi josparlaǵan bolatyn.
Jiynda eki negizgi máseleni qarastyrý josparlanǵan bolatyn:
- qoǵam quramyn anyqtaý, onda da sany jaǵynan (múmkin aktsionerlerdiń nemese direktorlar keńesiniń quramyndaǵy aldaǵy ózgeristerge bailanysty);
- ótken jyldardaǵy jinaqtalǵan tabysty dividend túrinde tóleý úshin bólýdi.
Sol kúni, 30 shildede kompaniia direktory aýysqan bolatyn: Inessa Kimniń ornyna Eýraziialyq banktiń burynǵy táýelsiz direktory Janbota Bekenov kelgen edi.
Aitqandai, kompaniiada dúdamal jaǵdai áli de saqtalýda: úshinshi aktsioner – Aleksandr Mashkevich qaitys bolǵannan beri jarty jylǵa jýyq ýaqyt ótti, biraq onyń úlesine kim mura bolǵany áli belgisiz.
Eýraziialyq qarjylyq kompaniia ainalasyndaǵy jaǵdai sot tóńiregindegi daý-damaimen shielenise túsýde.
"Almaty soty Mýnisa Shodieva, Patoh Shodiev jáne Shýhrat Ibragimovtyń talaptaryn bir óndiriske biriktirdi. Buryn aktsionerler jinalysyn jasaýǵa Ibragimov jol bermei kelgeni belgili, al Shodiev olardy shaqyrýmen álek", delingen habarlamada.
Naýryz aiynda Bloomberg basylymy Mashkevich pen Shodiev "eýraziialyqtardyń" qarjylyq aktivterin kásipker Timýr Turlovqa 1 milliard dollarǵa satýdy josparlap otyrǵanyn jazǵan bolatyn.
Esterińizge sala keteiik, Eýraziialyq qarjy kompaniiasynyń aktsionerleri arasynda janjal burq etken. Patoh Shodiev direktorlar keńesiniń sheshimderiniń kúshin joiýǵa umtylyp, aktsionerlerdiń kezekten tys jinalysyna bastamashy bolýda. Daýǵa jańa taraptar – kompaniianyń ózi jáne Shodievtiń qyzy da aralasýda. Kompaniia aktsionerleriniń ishki qaqtyǵysy jáne táýekelderdi basqarýdaǵy buzýshylyqtar retteýshi organnyń nazaryna ilikti. QNRDA bul jait banktiń qarjylyq turaqtylyǵy men klientterdiń senimine áser etýi múmkin ekenin eskertti. Keiinirek sot kompaniianyń teń iesi Patoh Shodievke Direktorlar keńesiniń sheshimderin jaramsyz dep taný jáne moraldyq zalal úshin 1 million teńge ótemaqy óndirip alý týraly talap-aryzyn qanaǵattandyrmaǵany belgili boldy. Sondai-aq onyń qyzy Mýnisa Shodievanyń Shýhrat Ibragimov pen táýelsiz direktor Andrei Kopovqa qarsy shaǵymdary da qaraýsyz qaldyrylǵan.
