AQSH Ókilder palatasynyń múshesi Don Beıkon Memlekettik departament qyzmetkeri Stıv Ýıtkoffty Reseı múddesin qoldap otyr dep aıyptady. Aıtýynsha, Ýıtkofftyń pozısıasy AQSH-tyń Ýkraınaǵa qatysty resmı ustanymyna qaıshy keledi, dep habarlaıdy Dalanews.kz.

“Reseı basqynshylyǵyna qarsylyq tanytyp, Ýkraınanyń egemen ári demokratıalyq memleket bolyp qalýyn qoldaıtyndar úshin Ýıtkofftyń tolyq Reseıdi jaqtap otyrǵany aıdan anyq. Oǵan kelissóz júrgizýdi senip tapsyrýǵa bolmaıdy. Reseıdiń aqyly agenti budan beter istemes edi. Ony qyzmetten bosatý qajet”, - dedi Beıkon.

Bloomberg jarıalaǵan Ýıtkoff pen Reseı prezıdenti ákimshiliginiń ókili Iýrıı Ýshakov arasyndaǵy áńgimeden keıin basqa kongresmender de synǵa qosyldy.

Máselen, kongresmen Ted Lú Ýıtkoffty “naǵyz opasyz” dep atady.

“Ol AQSH-qa emes, Reseıdiń múddesine jumys istep otyr. Mundaı adamǵa memlekettik deńgeıdegi eshbir mindet júktelmeýi tıis”, - dedi.

Respýblıkalyq partıa múshesi Braıan Fıtspatrık te jaǵdaıǵa alańdaýshylyq tanytty.

“Bul - óte kúrdeli másele. Osyndaı jasyryn kezdesýler toqtaýy tıis. Memlekettik hatshy Rýbıoǵa óz mindetin adal ári ádil atqarýǵa múmkindik berý qajet”, - dedi ol.

Al AQSH-tyń Reseıdegi burynǵy elshisi Maıkl Makfoll ulttyq qaýipsizdik salasynda júrgen kez kelgen qyzmetkerdiń basty mindeti eń aldymen AQSH-tyń múddesin qorǵaý ekenin atap ótti.

“Ásirese “Pýtın tárizdi soǵysqumar ımperıalyq bılikterdiń” múddesine qyzmet etýge bolmaıdy”, — dedi ol.