اقش وكىلدەر پالاتاسىنىڭ مۇشەسى دون بەيكون مەملەكەتتىك دەپارتامەنت قىزمەتكەرى ستيۆ ۋيتكوففتى رەسەي مۇددەسىن قولداپ وتىر دەپ ايىپتادى. ايتۋىنشا، ۋيتكوففتىڭ پوزيسياسى اقش-تىڭ ۋكرايناعا قاتىستى رەسمي ۇستانىمىنا قايشى كەلەدى، دەپ حابارلايدى Dalanews.kz.
“رەسەي باسقىنشىلىعىنا قارسىلىق تانىتىپ، ۋكراينانىڭ ەگەمەن ءارى دەموكراتيالىق مەملەكەت بولىپ قالۋىن قولدايتىندار ءۇشىن ۋيتكوففتىڭ تولىق رەسەيدى جاقتاپ وتىرعانى ايدان انىق. وعان كەلىسسوز جۇرگىزۋدى سەنىپ تاپسىرۋعا بولمايدى. رەسەيدىڭ اقىلى اگەنتى بۇدان بەتەر ىستەمەس ەدى. ونى قىزمەتتەن بوساتۋ قاجەت”، - دەدى بەيكون.
Bloomberg جاريالاعان ۋيتكوفف پەن رەسەي پرەزيدەنتى اكىمشىلىگىنىڭ وكىلى يۋريي ۋشاكوۆ اراسىنداعى اڭگىمەدەن كەيىن باسقا كونگرەسسمەندەر دە سىنعا قوسىلدى.
ماسەلەن، كونگرەسسمەن تەد ليۋ ۋيتكوففتى “ناعىز وپاسىز” دەپ اتادى.
“ول اقش-قا ەمەس، رەسەيدىڭ مۇددەسىنە جۇمىس ىستەپ وتىر. مۇنداي ادامعا مەملەكەتتىك دەڭگەيدەگى ەشبىر مىندەت جۇكتەلمەۋى ءتيىس”، - دەدى.
رەسپۋبليكالىق پارتيا مۇشەسى برايان فيتسپاتريك تە جاعدايعا الاڭداۋشىلىق تانىتتى.
“بۇل - وتە كۇردەلى ماسەلە. وسىنداي جاسىرىن كەزدەسۋلەر توقتاۋى ءتيىس. مەملەكەتتىك حاتشى رۋبيوعا ءوز مىندەتىن ادال ءارى ءادىل اتقارۋعا مۇمكىندىك بەرۋ قاجەت”، - دەدى ول.
ال اقش-تىڭ رەسەيدەگى بۇرىنعى ەلشىسى مايكل ماكفولل ۇلتتىق قاۋىپسىزدىك سالاسىندا جۇرگەن كەز كەلگەن قىزمەتكەردىڭ باستى مىندەتى ەڭ الدىمەن اقش-تىڭ مۇددەسىن قورعاۋ ەكەنىن اتاپ ءوتتى.
“اسىرەسە “پۋتين ءتارىزدى سوعىسقۇمار يمپەريالىق بيلىكتەردىڭ” مۇددەسىنە قىزمەت ەتۋگە بولمايدى”، — دەدى ول.
