Qazaqstannyń Reseidegi tótenshe elshisi Dáýren Abaev TACC agenttigine kólemdi suhbat berip, Qazaqstan men Resei bailanysy, Ýkrainaǵa kómek jáne eldegi rýsofobiia týraly aitty, - dep habarlaidy Dalanews.kz.
Abaevtyń sózinshe, prezident Qasym-Jomart Toqaev 8-9 mamyrda Máskeýge barady.
Sonymen qatar, suhbatta Dáýren Abaev Qazaqstannyń Qorǵanys ministrligi Ýkrainaǵa áskeri quraldar jetkizip júr degen qáýesetke qatysty pikir bildirdi.
"Iá, bul rasynda qaýeset. Oǵan ósek, feik jáne jalǵan aqparat retinde qaraý kerek. Biraq munyń ózin ekige bólip qarastyrýymyz kerek dep oilaimyn. Eń aldymen feikter men tekserilmegen aqparattarǵa qatysty. Adamdarda neniń qajet, neniń qajet emes ekenin anyqtai alatyn aqparattyq gigiena bolýy kerek dep esepteimin.
Qazaqstanǵa qatysty, iá, ókinishke qarai, ara-tura qoǵamdyq oidy qalyptastyrýǵa áser etetin feikterge tap bolyp jatamyz. Negativ aqparattar aǵyny bolyp jatyr, erte me, kesh pe onyń da izi qalady. Jalǵan aqparattarǵa senbeýge shaqyramyn. Qazaqstan men Resei – odaqtas elder. Joǵary saiasi deńgeide óte jaqsy bailanys bar. Qalǵan aqparattyń bárin tekserip júrý kerek", - deidi Abaev.
Sonymen qatar, Reseidegi elshi Qazaqstandaǵy rýsofobiiaǵa qatysty áńgimeler de feik ekenin jetkizdi.
"Rýsofobiia týraly aqparattar kóbine anonim telegram arnalarda tarap jatady. Munyń bári sandyraq. Qazaqstanda rýsofobiia joq. Qazaqstanda 3 millionǵa jýyq etnikalyq orys halqy turady. Endi elde rýsofobiia baryn elestetip kórińizshi. Ondai bolǵan da emes. Nege? Sebebi tarihymyz bir, mentalitetimiz jáne mádeni kodymyz da uqsas keledi", - deidi Dáýren Abaev.
Dáýren Abaev Astana men Kiev arasynda áskeri salasynda da, qorǵanys salasynda da bailanys joǵyn aitty.
Suhbatta Dáýren Abaev Qazaqstan Armeniia men Ázerbaijan qaqtyǵysyna ne úshin aralasqanyn túsindirdi.
"Qazaqstan kez kelgen álemdik protseste kómektesýge daiyn. Ol tek Resei men Ýkrainaǵa ǵana qatysty emes, sondai-aq Armeniia men Ázerbaijan, siriialyq jáne irandyq problematikaǵa da qatysty bolýy múmkin. Eki el arasynda deldal bolý degen artyq shyǵar, biraq qandai da bir kelisimge kelý úshin alań usynýǵa daiynbyz", - deidi Dáýren Abaev.
Aita keteiik, elde birqatar qyzmet atqarǵan Dáýren Abaev 2023 jyldyń 3 shildesinen beri Qazaqstannyń Reseidegi elshisi qyzmetin atqaryp júr.
