قازاقستاننىڭ رەسەيدەگى توتەنشە ەلشىسى داۋرەن ابايەۆ TACC اگەنتتىگىنە كولەمدى سۇحبات بەرىپ، قازاقستان مەن رەسەي بايلانىسى، ۋكرايناعا كومەك جانە ەلدەگى رۋسوفوبيا تۋرالى ايتتى، - دەپ حابارلايدى Dalanews.kz.
ابايەۆتىڭ سوزىنشە، پرەزيدەنت قاسىم-جومارت توقايەۆ 8-9 مامىردا ماسكەۋگە بارادى.
سونىمەن قاتار، سۇحباتتا داۋرەن ابايەۆ قازاقستاننىڭ قورعانىس مينيسترلىگى ۋكرايناعا اسكەري قۇرالدار جەتكىزىپ ءجۇر دەگەن قاۋەسەتكە قاتىستى پىكىر ءبىلدىردى.
"ءيا، بۇل راسىندا قاۋەسەت. وعان وسەك، فەيك جانە جالعان اقپارات رەتىندە قاراۋ كەرەك. ءبىراق مۇنىڭ ءوزىن ەكىگە ءبولىپ قاراستىرۋىمىز كەرەك دەپ ويلايمىن. ەڭ الدىمەن فەيكتەر مەن تەكسەرىلمەگەن اقپاراتتارعا قاتىستى. ادامداردا نەنىڭ قاجەت، نەنىڭ قاجەت ەمەس ەكەنىن انىقتاي الاتىن اقپاراتتىق گيگيەنا بولۋى كەرەك دەپ ەسەپتەيمىن.
قازاقستانعا قاتىستى، ءيا، وكىنىشكە قاراي، ارا-تۇرا قوعامدىق ويدى قالىپتاستىرۋعا اسەر ەتەتىن فەيكتەرگە تاپ بولىپ جاتامىز. نەگاتيۆ اقپاراتتار اعىنى بولىپ جاتىر، ەرتە مە، كەش پە ونىڭ دا ءىزى قالادى. جالعان اقپاراتتارعا سەنبەۋگە شاقىرامىن. قازاقستان مەن رەسەي – وداقتاس ەلدەر. جوعارى ساياسي دەڭگەيدە وتە جاقسى بايلانىس بار. قالعان اقپاراتتىڭ ءبارىن تەكسەرىپ ءجۇرۋ كەرەك"، - دەيدى ابايەۆ.
سونىمەن قاتار، رەسەيدەگى ەلشى قازاقستانداعى رۋسوفوبياعا قاتىستى اڭگىمەلەر دە فەيك ەكەنىن جەتكىزدى.
"رۋسوفوبيا تۋرالى اقپاراتتار كوبىنە انونيم تەلەگرام ارنالاردا تاراپ جاتادى. مۇنىڭ ءبارى ساندىراق. قازاقستاندا رۋسوفوبيا جوق. قازاقستاندا 3 ميلليونعا جۋىق ەتنيكالىق ورىس حالقى تۇرادى. ەندى ەلدە رۋسوفوبيا بارىن ەلەستەتىپ كورىڭىزشى. ونداي بولعان دا ەمەس. نەگە؟ سەبەبى تاريحىمىز ءبىر، مەنتاليتەتىمىز جانە مادەني كودىمىز دا ۇقساس كەلەدى"، - دەيدى داۋرەن ابايەۆ.
داۋرەن ابايەۆ استانا مەن كييەۆ اراسىندا اسكەري سالاسىندا دا، قورعانىس سالاسىندا دا بايلانىس جوعىن ايتتى.
سۇحباتتا داۋرەن ابايەۆ قازاقستان ارمەنيا مەن ازەربايجان قاقتىعىسىنا نە ءۇشىن ارالاسقانىن ءتۇسىندىردى.
"قازاقستان كەز كەلگەن الەمدىك پروسەستە كومەكتەسۋگە دايىن. ول تەك رەسەي مەن ۋكرايناعا عانا قاتىستى ەمەس، سونداي-اق ارمەنيا مەن ازەربايجان، سيريالىق جانە يراندىق پروبلەماتيكاعا دا قاتىستى بولۋى مۇمكىن. ەكى ەل اراسىندا دەلدال بولۋ دەگەن ارتىق شىعار، ءبىراق قانداي دا ءبىر كەلىسىمگە كەلۋ ءۇشىن الاڭ ۇسىنۋعا دايىنبىز"، - دەيدى داۋرەن ابايەۆ.
ايتا كەتەيىك، ەلدە ءبىرقاتار قىزمەت اتقارعان داۋرەن ابايەۆ 2023 جىلدىڭ 3 شىلدەسىنەن بەرى قازاقستاننىڭ رەسەيدەگى ەلشىسى قىزمەتىن اتقارىپ ءجۇر.
