Ýkraina Máskeý men Máskeý oblysyna drondar arqyly shabýyl jasady. Resei Qorǵanys ministrliginiń dereginshe, barlyǵy 16 ushqyshsyz apparat atyp túsirilgen, dep habarlaidy Dalanews.kz.
Dron shabýyly saldarynan Máskeýdiń barlyq áýejaiy – Sheremetevo, Domodedovo, Vnýkovo jáne Jýkovskiide áýe qatynasy ýaqytsha toqtady. Tún ishinde Týla qalasynda da jarylystar boldy.
RF Qorǵanys ministrligi ótken túnde el aýmaǵy boiynsha 114 dronnyń joiylǵanyn habarlady.
"Ótken túnde kezekshi áýeqorǵanys kúshteri Ýkrainaǵa tiesili 114 ushqyshsyz ushý apparatyn atyp túsirdi", – delingen Resei qorǵanys vedomstvosynyń 22 qyrkúiek, dúisenbi kúngi Telegram-arnasyndaǵy habarlamasynda.
Atap aitqanda, 25 dron Rostov oblysy ústinde, taǵy 25 dron Krasnodar ólkesi aýmaǵynda joiyldy. Sonymen qatar 19 dron Belgorod oblysynda, 13 dron Astrahan oblysynda, 10 dron anneksiialanǵan Qyrymda, 7 dron Briansk oblysynda, 5 dron Azov teńizi ústinde, 3 dron Iaroslavl jáne 3 dron Volgograd oblystarynda, 2 dron Qara teńiz ústinde, 1 dron Kýrsk jáne 1 dron Voronej oblystary aýmaǵynda atyp túsirilgeni naqtylandy.
Qyrymnyń anneksiialanǵan biligi atynan Sergei Aksenov túngi ýaqytta Telegram-arnasynda habarlap, Foros kenti mańyndaǵy dron shabýyly saldarynan úsh adam qaza taýyp, on alty adamnyń jaralanǵanyn málimdedi.
"Qaza tapqandardyń týǵan-týystaryna qaiǵyryp kóńil aitamyn. Zardap shekkenderdiń tezirek saýyǵyp ketýin tileimin. Olarǵa mindetti túrde qajetti kómek kórsetiledi", – dedi ol.
Rosaviatsiia tańerteń Ivanovo, Iaroslavl jáne Volgograd áýejailarynda da ushaq qabyldaý jáne jiberý shektelgenin habarlady.
