ۋكراينا ماسكەۋ مەن ماسكەۋ وبلىسىنا دروندار ارقىلى شابۋىل جاسادى. رەسەي قورعانىس مينيسترلىگىنىڭ دەرەگىنشە، بارلىعى 16 ۇشقىشسىز اپپارات اتىپ تۇسىرىلگەن، دەپ حابارلايدى Dalanews.kz.

درون شابۋىلى سالدارىنان ماسكەۋدىڭ بارلىق اۋەجايى – شەرەمەتيەۆو، دومودەدوۆو، ۆنۋكوۆو جانە جۋكوۆسكييدە اۋە قاتىناسى ۋاقىتشا توقتادى. ءتۇن ىشىندە تۋلا قالاسىندا دا جارىلىستار بولدى.

رف قورعانىس مينيسترلىگى وتكەن تۇندە ەل اۋماعى بويىنشا 114 دروننىڭ جويىلعانىن حابارلادى.

"وتكەن تۇندە كەزەكشى اۋەقورعانىس كۇشتەرى ۋكرايناعا تيەسىلى 114 ۇشقىشسىز ۇشۋ اپپاراتىن اتىپ ءتۇسىردى"، – دەلىنگەن رەسەي قورعانىس ۆەدومستۆوسىنىڭ 22 قىركۇيەك، دۇيسەنبى كۇنگى Telegram-ارناسىنداعى حابارلاماسىندا.

اتاپ ايتقاندا، 25 درون روستوۆ وبلىسى ۇستىندە، تاعى 25 درون كراسنودار ولكەسى اۋماعىندا جويىلدى. سونىمەن قاتار 19 درون بەلگورود وبلىسىندا، 13 درون استراحان وبلىسىندا، 10 درون اننەكسيالانعان قىرىمدا، 7 درون بريانسك وبلىسىندا، 5 درون ازوۆ تەڭىزى ۇستىندە، 3 درون ياروسلاۆل جانە 3 درون ۆولگوگراد وبلىستارىندا، 2 درون قارا تەڭىز ۇستىندە، 1 درون كۋرسك جانە 1 درون ۆورونەج وبلىستارى اۋماعىندا اتىپ تۇسىرىلگەنى ناقتىلاندى.

قىرىمنىڭ اننەكسيالانعان بيلىگى اتىنان سەرگەي اكسەنوۆ تۇنگى ۋاقىتتا Telegram-ارناسىندا حابارلاپ، فوروس كەنتى ماڭىنداعى درون شابۋىلى سالدارىنان ءۇش ادام قازا تاۋىپ، ون التى ادامنىڭ جارالانعانىن مالىمدەدى.

"قازا تاپقانداردىڭ تۋعان-تۋىستارىنا قايعىرىپ كوڭىل ايتامىن. زارداپ شەككەندەردىڭ تەزىرەك ساۋىعىپ كەتۋىن تىلەيمىن. ولارعا مىندەتتى تۇردە قاجەتتى كومەك كورسەتىلەدى"، – دەدى ول.

روساۆياسيا تاڭەرتەڭ يۆانوۆو، ياروسلاۆل جانە ۆولگوگراد اۋەجايلارىندا دا ۇشاق قابىلداۋ جانە جىبەرۋ شەكتەلگەنىن حابارلادى.