Premer-ministr Oljas Bektenov tsifrlyq teńgeniń kómegimen aqshany tańbalaýǵa jáne qadaǵalaýǵa bailanysty pilottyq jobalardy júzege asyrý jóninde jiyn ótkizdi. Jiynda memlekettik jumsaý úderisterine ulttyq tsifrlyq valiýtany engizýdiń barysy qaraldy, dep habarlaidy Dalanews.kz.
Talqylaýǵa sondai-aq Premer-ministrdiń orynbasary – ulttyq ekonomika ministri Serik Jumanǵarin, tsifrlyq damý, innovatsiialar jáne aeroǵarysh ónerkásibi ministri Jaslan Mádiev, eńbek jáne halyqty áleýmettik qorǵaý ministri Svetlana Jaqypova, qarjy ministri Mádi Tákiev jáne beine konferentsiia bailanysy arqyly ishki ister ministri Erjan Sádenov, memlekettik qyzmet isteri agenttiginiń tóraǵasy Darhan Jazyqbai qatysty.
Ulttyq bank tóraǵasy Timýr Súleimenov búgingi tańda ainalymǵa 257,5 mlrd tsifrlyq teńge shyǵarylǵanyn habarlady. Platforma qazir tájiribelik-ónerkásiptik paidalaný kezeńinde, aldaǵy jeltoqsan aiynda ony tolyqqandy iske qosý josparlanyp otyr.
Joldardy jóndeýge arnalǵan qarajatty tańbalaý «Pavlodar – Atyraý» jáne «Muqyr – Qulsary» jobalarynda synaldy. Sondai-aq «Dostyq – Moiynty» temir jolynyń jáne «Taldyqorǵan – Úsharal» gaz qubyry ýchaskesiniń qurylysyn qosa alǵanda, Ulttyq qordan qarjylandyrylatyn jobalarǵa bólingen qarjynyń maqsatty jumsalýyn baqylaý úshin de paidalanylýda. Aldaǵy ýaqytta «Beineý – Bozoi – Shymkent» gaz qubyryn, gaz bólý kesheni jáne «Baqty – Aiagóz» temirjol ýchaskesi siiaqty jobalardy júzege asyrý josparda tur. Budan basqa, «Aýyl amanaty» shaǵyn nesieleý baǵdarlamasy aiasynda qarajatty ýaqytsha buǵattaý tetigi synaqtan sátti ótti.
Tsifrlyq teńgeni engizý, sondai-aq jyljymaityn múlikpen jáne avtokólikpen mámileler jasaý, mekteptegi tamaqtaný, qymbat taýarlardy satyp alý, agroónerkásiptik keshendegi memlekettik nesieleý quraldary siiaqty basqa da baǵyttarda pysyqtalyp jatyr.
Jiynda sondai-aq normativtik-quqyqtyq bazany jetildirýge de nazar aýdaryldy. Búgingi tańda «Tólemder jáne tólem júieleri týraly» Zańǵa, tsifrlyq shot uǵymyn jáne basqa da ilespe normalardy engizýdi qosa alǵanda, birqatar túzetýler daiyndalǵan.
Premer-ministr tsifrlyq teńgeniń negizgi artyqshylyqtaryn atap ótti. Olar – baǵdarlamalaýǵa jáne tańbalaýǵa ikemdigi. Bul qarajattyń qozǵalysyn qadaǵalaýǵa jáne maqsatsyz paidalanýdyń aldyn alýǵa múmkindik beredi.
«Memleket basshysynyń tapsyrmasyna sáikes, tsifrlyq teńgeniń kómegimen aqshany tańbalaý jáne qadaǵalaý boiynsha pilottyq jobalar kezeń-kezeńimen júzege asyrylýda. Tsifrlyq teńge biýdjet qarajatyn maqsatty paidalanýda tolyq ashyqtyqty jáne júieli baqylaýdy qamtamasyz etedi. Aqshany tańbalaýdy keńeitýdi tiimdi júzege asyrý úshin aqparattyq júielerdiń «Tsifrlyq teńge» platformasymen ýaqtyly integratsiialanýyn qamtamasyz etý qajet. Sondai-aq tiisti normativtik quqyqtyq bazany pysyqtaý talap etiledi. «Boialǵan aqsha» tetigin engizý sapaly jáne tolyq kólemde júzege asyrylýy tiis. Jaqyn arada Ulttyq qor men biýdjet esebinen qarjylandyrylatyn keminde júz iri jobany «tsifrlyq teńge» formatyna aýystyrýdy tapsyramyn», — dep atap ótti Oljas Bektenov.
Jiyn qorytyndysy boiynsha Premer-ministr memlekettik organdarǵa Ulttyq bankpen jáne múddeli uiymdarmen birlesip, ekonomikanyń jekelegen sektorlaryna tsifrlyq teńgeni keń kólemde jedel integratsiialaý jónindegi Jol kartasyn ázirleýdi tapsyrdy.
