پرەمەر-مينيستر ولجاس بەكتەنوۆ سيفرلىق تەڭگەنىڭ كومەگىمەن اقشانى تاڭبالاۋعا جانە قاداعالاۋعا بايلانىستى پيلوتتىق جوبالاردى جۇزەگە اسىرۋ جونىندە جيىن وتكىزدى. جيىندا مەملەكەتتىك جۇمساۋ ۇدەرىستەرىنە ۇلتتىق سيفرلىق ۆاليۋتانى ەنگىزۋدىڭ بارىسى قارالدى، دەپ حابارلايدى Dalanews.kz.

تالقىلاۋعا سونداي-اق پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين، سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى جاسلان مادييەۆ، ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا، قارجى ءمينيسترى ءمادي تاكييەۆ جانە بەينە كونفەرەنسيا بايلانىسى ارقىلى ىشكى ىستەر ءمينيسترى ەرجان سادەنوۆ، مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقباي قاتىستى.

ۇلتتىق بانك ءتوراعاسى تيمۋر سۇلەيمەنوۆ بۇگىنگى تاڭدا اينالىمعا 257،5 ملرد سيفرلىق تەڭگە شىعارىلعانىن حابارلادى. پلاتفورما ءقازىر تاجىريبەلىك-ونەركاسىپتىك پايدالانۋ كەزەڭىندە، الداعى جەلتوقسان ايىندا ونى تولىققاندى ىسكە قوسۋ جوسپارلانىپ وتىر.

ۇلتتىق بانكتىڭ سيفرلىق ترانسفورماسيالاۋ جەتەكشىسى بينۇر جالەنوۆ بايانداعانداي، سيفرلىق تەڭگە بۇگىندە وننان استام باعىت بويىنشا سىنالعان. اتاپ ايتقاندا، سيفرلىق ققس سالىقتى قايتارۋ مەرزىمىن 75-تەن 5 جۇمىس كۇنىنە دەيىن قىسقارتۋعا مۇمكىندىك تۋدى.

جولداردى جوندەۋگە ارنالعان قاراجاتتى تاڭبالاۋ «پاۆلودار – اتىراۋ» جانە «مۇقىر – قۇلسارى» جوبالارىندا سىنالدى. سونداي-اق «دوستىق – مويىنتى» تەمىر جولىنىڭ جانە «تالدىقورعان – ءۇشارال» گاز قۇبىرى ۋچاسكەسىنىڭ قۇرىلىسىن قوسا العاندا، ۇلتتىق قوردان قارجىلاندىرىلاتىن جوبالارعا بولىنگەن قارجىنىڭ ماقساتتى جۇمسالۋىن باقىلاۋ ءۇشىن دە پايدالانىلۋدا. الداعى ۋاقىتتا «بەينەۋ – بوزوي – شىمكەنت» گاز قۇبىرىن، گاز ءبولۋ كەشەنى جانە «باقتى – اياگوز» تەمىرجول ۋچاسكەسى سياقتى جوبالاردى جۇزەگە اسىرۋ جوسپاردا تۇر. بۇدان باسقا، «اۋىل اماناتى» شاعىن نەسيەلەۋ باعدارلاماسى اياسىندا قاراجاتتى ۋاقىتشا بۇعاتتاۋ تەتىگى سىناقتان ءساتتى ءوتتى.

سيفرلىق تەڭگەنى ەنگىزۋ، سونداي-اق جىلجىمايتىن مۇلىكپەن جانە اۆتوكولىكپەن مامىلەلەر جاساۋ، مەكتەپتەگى تاماقتانۋ، قىمبات تاۋارلاردى ساتىپ الۋ، اگروونەركاسىپتىك كەشەندەگى مەملەكەتتىك نەسيەلەۋ قۇرالدارى سياقتى باسقا دا باعىتتاردا پىسىقتالىپ جاتىر.

جيىندا سونداي-اق نورماتيۆتىك-قۇقىقتىق بازانى جەتىلدىرۋگە دە نازار اۋدارىلدى. بۇگىنگى تاڭدا «تولەمدەر جانە تولەم جۇيەلەرى تۋرالى» زاڭعا، سيفرلىق شوت ۇعىمىن جانە باسقا دا ىلەسپە نورمالاردى ەنگىزۋدى قوسا العاندا، ءبىرقاتار تۇزەتۋلەر دايىندالعان.

پرەمەر-مينيستر سيفرلىق تەڭگەنىڭ نەگىزگى ارتىقشىلىقتارىن اتاپ ءوتتى. ولار – باعدارلامالاۋعا جانە تاڭبالاۋعا يكەمدىگى. بۇل قاراجاتتىڭ قوزعالىسىن قاداعالاۋعا جانە ماقساتسىز پايدالانۋدىڭ الدىن الۋعا مۇمكىندىك بەرەدى.

«مەملەكەت باسشىسىنىڭ تاپسىرماسىنا سايكەس، سيفرلىق تەڭگەنىڭ كومەگىمەن اقشانى تاڭبالاۋ جانە قاداعالاۋ بويىنشا پيلوتتىق جوبالار كەزەڭ-كەزەڭىمەن جۇزەگە اسىرىلۋدا. سيفرلىق تەڭگە بيۋدجەت قاراجاتىن ماقساتتى پايدالانۋدا تولىق اشىقتىقتى جانە جۇيەلى باقىلاۋدى قامتاماسىز ەتەدى. اقشانى تاڭبالاۋدى كەڭەيتۋدى ءتيىمدى جۇزەگە اسىرۋ ءۇشىن اقپاراتتىق جۇيەلەردىڭ «سيفرلىق تەڭگە» پلاتفورماسىمەن ۋاقتىلى ينتەگراسيالانۋىن قامتاماسىز ەتۋ قاجەت. سونداي-اق ءتيىستى نورماتيۆتىك قۇقىقتىق بازانى پىسىقتاۋ تالاپ ەتىلەدى. «بويالعان اقشا» تەتىگىن ەنگىزۋ ساپالى جانە تولىق كولەمدە جۇزەگە اسىرىلۋى ءتيىس. جاقىن ارادا ۇلتتىق قور مەن بيۋدجەت ەسەبىنەن قارجىلاندىرىلاتىن كەمىندە ءجۇز ءىرى جوبانى «سيفرلىق تەڭگە» فورماتىنا اۋىستىرۋدى تاپسىرامىن»، — دەپ اتاپ ءوتتى ولجاس بەكتەنوۆ.

جيىن قورىتىندىسى بويىنشا پرەمەر-مينيستر مەملەكەتتىك ورگاندارعا ۇلتتىق بانكپەن جانە مۇددەلى ۇيىمدارمەن بىرلەسىپ، ەكونوميكانىڭ جەكەلەگەن سەكتورلارىنا سيفرلىق تەڭگەنى كەڭ كولەمدە جەدەل ينتەگراسيالاۋ جونىندەگى جول كارتاسىن ازىرلەۋدى تاپسىردى.