Ekinshi deńgeidegi bankterdiń resýrstaryn úkimettik baǵdarlamalarǵa, atap aitqanda, iri infraqurylymdyq jobalardyń qurylysy men jańǵyrtý jumysyna tartýǵa bolady jáne tartý kerek degen másele kóp aityldy. Memleket bóletin qarajatty kezeń-kezeńimen nesie mólsherlemesin sýbsidiialaýǵa qarai baǵyttaý kerek. Prezident Qasym-Jomart Toqaev búgingi Úkimettiń keńeitilgen otyrysyndai osylai dei kele, ekonomikalyq qaitarymy joǵary strategiialyq jobalardy júzege asyrǵan kezde BZJQ-dan naryq sharttaryna sai "uzaq merzimge beriletin" qarjyny anaǵurlym belsendi tartýǵa bolatynyn aitty, dep jazady Dalanews.kz.
Memleket basshysynyń aitýynsha, biznestiń kepilge qoiatyn múlkiniń bolmaýy naqty sektordy kreditteýge kedergi keltiredi.
"Sondyqtan zaimdy kepildendirý quraldaryn kóbeitý qajet. Úkimet salalyq damý institýttarymen birlesip, kepildik qoryn qurý máselesin pysyqtaýy kerek. Bankterdiń, korporatsiialardyń, ortalyq jáne jergilikti bilik organdarynyń jyl saiynǵy jarnasy esebinen qarjylandyrylatyn mundai qorlar birqatar elde óz tiimdiligin kórsetti. Sondai-aq ekonomikalyq qaitarymy joǵary strategiialyq jobalardy júzege asyrǵan kezde Biryńǵai zeinetaqy jinaqtaýshy qorynan naryq sharttaryna sai "uzaq merzimge beriletin" qarjyny anaǵurlym belsendi tartýǵa bolady", - dedi Qasym-Jomart Toqaev.
Buǵan deiin Úkimettiń keńeitilgen otyrysynda Ulttyq bank basshysy Timýr Súleimenov Ulttyq qor qarjysynan iske asyrylatyn jobalardy baǵalaýdyń jańa tetigin tanystyrǵan bolatyn. Onyń aitýynsha, bul tetik iske qosylyp, óz tiimdiligin tanytsa Ulttyq qordan ýys-ýys aqsha alý tyiylatyn kórinedi. Sondai-aq Prezident bankterdiń memleketten alǵan 15 jyldyq qaryzyn qaitarýǵa mindetti ekenin qadap aitqan edi.
