ەكىنشى دەڭگەيدەگى بانكتەردىڭ رەسۋرستارىن ۇكىمەتتىك باعدارلامالارعا، اتاپ ايتقاندا، ءىرى ينفراقۇرىلىمدىق جوبالاردىڭ قۇرىلىسى مەن جاڭعىرتۋ جۇمىسىنا تارتۋعا بولادى جانە تارتۋ كەرەك دەگەن ماسەلە كوپ ايتىلدى. مەملەكەت بولەتىن قاراجاتتى كەزەڭ-كەزەڭىمەن نەسيە مولشەرلەمەسىن سۋبسيديالاۋعا قاراي باعىتتاۋ كەرەك. پرەزيدەنت قاسىم-جومارت توقايەۆ بۇگىنگى ۇكىمەتتىڭ كەڭەيتىلگەن وتىرىسىنداي وسىلاي دەي كەلە، ەكونوميكالىق قايتارىمى جوعارى ستراتەگيالىق جوبالاردى جۇزەگە اسىرعان كەزدە بزجق-دان نارىق شارتتارىنا ساي "ۇزاق مەرزىمگە بەرىلەتىن" قارجىنى اناعۇرلىم بەلسەندى تارتۋعا بولاتىنىن ايتتى، دەپ جازادى Dalanews.kz.
مەملەكەت باسشىسىنىڭ ايتۋىنشا، بيزنەستىڭ كەپىلگە قوياتىن مۇلكىنىڭ بولماۋى ناقتى سەكتوردى كرەديتتەۋگە كەدەرگى كەلتىرەدى.
"سوندىقتان زايمدى كەپىلدەندىرۋ قۇرالدارىن كوبەيتۋ قاجەت. ۇكىمەت سالالىق دامۋ ينستيتۋتتارىمەن بىرلەسىپ، كەپىلدىك قورىن قۇرۋ ماسەلەسىن پىسىقتاۋى كەرەك. بانكتەردىڭ، كورپوراسيالاردىڭ، ورتالىق جانە جەرگىلىكتى بيلىك ورگاندارىنىڭ جىل سايىنعى جارناسى ەسەبىنەن قارجىلاندىرىلاتىن مۇنداي قورلار ءبىرقاتار ەلدە ءوز تيىمدىلىگىن كورسەتتى. سونداي-اق ەكونوميكالىق قايتارىمى جوعارى ستراتەگيالىق جوبالاردى جۇزەگە اسىرعان كەزدە ءبىرىڭعاي زەينەتاقى جيناقتاۋشى قورىنان نارىق شارتتارىنا ساي "ۇزاق مەرزىمگە بەرىلەتىن" قارجىنى اناعۇرلىم بەلسەندى تارتۋعا بولادى"، - دەدى قاسىم-جومارت توقايەۆ.
بۇعان دەيىن ۇكىمەتتىڭ كەڭەيتىلگەن وتىرىسىندا ۇلتتىق بانك باسشىسى تيمۋر سۇلەيمەنوۆ ۇلتتىق قور قارجىسىنان ىسكە اسىرىلاتىن جوبالاردى باعالاۋدىڭ جاڭا تەتىگىن تانىستىرعان بولاتىن. ونىڭ ايتۋىنشا، بۇل تەتىك ىسكە قوسىلىپ، ءوز تيىمدىلىگىن تانىتسا ۇلتتىق قوردان ۋىس-ۋىس اقشا الۋ تىيىلاتىن كورىنەدى. سونداي-اق پرەزيدەنت بانكتەردىڭ مەملەكەتتەن العان 15 جىلدىق قارىزىن قايتارۋعا مىندەتتى ەكەنىن قاداپ ايتقان ەدى.
