Abai oblysynyń ákimi Berik Ýáli qalany aralaý barysynda jergilikti halyqqa «Eski kópir» ataýymen belgili avtogýj kópirinde boldy,- dep habarlaidy Dalanews.kz
Mundaǵy asfalt jabynyn aýystyrý jumystary 16 tamyzda bastalǵan bolatyn. Uzyndyǵy 1 shaqyrymǵa jýyqtaityn joldyń eski asfalt qabaty qyryp alynyp, ornyna qalyńdyǵy 6 sm jańa tasty-mastikalyq asfalt tóseldi. Búgin jol belgileri syzylyp, erteńnen bastap qala turǵyndarynyń qoldanysyna beriledi.
«Oqýshylar kanikýlǵa shyqqan kezde aspaly kópirge asfalt tóseýdi bastaǵanbyz. Endi mine, jańa oqý jylynyń qarsańynda ekinshi kópirdi de aiaqtap, turǵyndardyń yńǵaily júrip-turýy úshin jaǵdai jasap otyrmyz. Buǵan deiin munda jyldamdyq saǵatyna 40 shaqyrym bolsa, endi avtokólikter 60 shaqyrym jyldamdyqpen júretin bolady», - dedi aimaq basshysy.
Oblys ákimi avtogýj kópiriniń janynda salynyp jatqan jańa kólik ótkeliniń qurylysy týraly da aitty. Biyl ótken «Ortalyq Aziia – Qytai» sammitinen keiin QHR Tóraǵasy aimaq elderine qaitarymsyz grant beriletinin atap ótken bolatyn. Atalǵan kópir qurylysyn qarjylandyrýdy qaitarymsyz grant esebinen sheshý jóninde oblys tarapynan usynys berilip, bastama Prezidenttiń qoldaýyna ie boldy.
«Úkimetpen, tiisti ministrliktermen kelisildi. Qarjy bólinetin boldy. Merdiger kompaniia jyl sońyna deiin kópirdiń birinshi kezeńin aiaqtap, kólikterdiń júrýine jaǵdai jasaimyz dep otyr. Iaǵni, jol ashylady. Asfalt tóseý jumystary kóktemde bastalady. Al eski kópir kelesi jyly jaiaý júrginshiler kópiri bolady. Batys elderindegidei qaita qalpyna keltirip, jaiaý júrginshilerge arnalǵan úlken kópir, Arbat jasaimyz. Qala ákimdigi joba usynady. Bul kólik ótkeli qala turǵyndary velosiped teýip, demalyp, emin-erkin júretin oryn bolady. Shaǵyn saýda oryndary ornatylady. Iaǵni, jaiaý júrginshiler Arbatyna ainaldyratyn bolamyz»,- dedi aimaq basshysy.
