Onyń aitýynsha 90-shy jyldary eldegi qylmystyq ahýal kúrt asqynyp, jaǵdai baqylaýdan shyǵýǵa shaq turǵan. Úkimet Ishki ister ministrliginiń jumysyna kóńili tolmai, sol tusta vedomstvoǵa jetekshilik etken Súleimenovke shúilikken.
“Atyn atamai-aq qoiǵanym durys shyǵar, premer-ministrlerdiń biri kabinetine shaqyryp, ministrliktiń uiymdasqan qylmysty aýyzdyqtai almai otyrǵanyn betime basty.
“Elde OPG-lar órip júr. Seniń qolyńnan qairan da kelmeidi. Odan da solardyń arasyndaǵy syi-qurmeti bar degenderdi, sonyń ishinde Ryjii Almazdy bilikke ákeleiik, qarjylai qoldaý kórseteiik. Seniń orynbasaryń bolsyn. Erteń búkil eldi ýysynda ustaityn bolady” dedi.
Ázildegen joq, shynyn aitty. Osyndai jolmen qylmys áleminiń ókilderin bilikke otyrǵyzǵan kórshiles elderdi úlgi etti. Buiyra sóilemese de, meni osy usynysqa iliktirgisi keletin syńai tanytty”, – deidi ol.
Súleimenov Úkimet basshysynyń usynysyn tiksine qabyldaǵan. Ryjii Almaz bilikke keler bolsa munyń sońy qantógiske ulasyp, elde korrýptsiia etek alatynyn eskertken.
“Ryjii Almazǵa" Ishki ister ministrligin tabystar bolsańyz, men tap qazir otstavkaǵa ketemin. Bul qyzmette bir kún de aialdamaimyn” dep ashyq aittym.
“Seniń taǵdyryńdy sheshetin men emes. Áitkenmen bilip júr, seniń jumysyńa múldem kóńilim tolmaidy” dep jaýap qatty. Áli kúnge deiin osyndai pátýasyz, paryqsyz usynys bolady eken-aý dep tańǵalamyn.
Qolyn qanǵa malǵan adamǵa tutas memlekettiń, turǵyndardyń taǵdyryn senip tapsyrý nonsens.
Mundai qyzmetke qylmys áleminiń serkesin otyrǵyzyp qoisaq, erteń júzdegen, myńdaǵan adamnyń qany tógiler edi ǵoi?! Men oǵan jeke kabinet bólip, ózimniń orynbasarym etip taǵaiyndaǵan kúnde qylmyskerdiń sybailasy bolǵanymnyń belgisi emes pe? Joq, men mundaiǵa bara almaimyn. Premerge sói dep jaýap qattym” – deidi Súleimenov.
Eks-ministr Úkimetbasshynyń usynysyn Nazarbaevqa jetkizbek bolǵan. Muny estigen premer Súleimenovke ókpelep qalǵan.
“Sonyń qolyńnan keleri sol ǵoi. Qushaq-qushaq qujatty qoltyǵyńa qysyp, doklad jasaýdan ózge bileriń joq. Bar júgir, jetkizip bar”, – dedi. Sonymen sóz támam boldy.
Men Ishki ister ministrligin basqarǵan tusta alty premer aýysyp úlgerdi. Eshbirinen qaimyqqan joqpyn, kúsh qurylymdary Elbasyǵa ǵana esep beredi dep eseptedim.
Osy kúnge deiingi azdy-kópti jetistigim úshin Nazarbaevqa qaryzdarmyn. Eshbireýdiń ústinen aryz-shaǵym aityp, prezidenttiń aldyna barmaǵan ekenmin. Al meniń ústimnen politsiiany jamandap, domalaq aryz joldaǵan sheneýnikterdi sanamalar bolsam, on saýsaq túgel búgiledi”, – deidi ol.
Eks-ministr óziniń ósek-aiańnan ada bolǵanyn, kabinet kezip sóz tasymaǵanyn aityp ant-sý ishken eken. Intrigamen ainalysqandy unatpaǵan. Biliktegi túrli-túrli klandardyń kikiljińine aralaspai, aýlaq júrgen.
“Sot pen prokýratýra ókilderi jii-jii “abalasyp” qalatyn. Prokýratýra qyzmetkerleri men Ulttyq qaýipsizdik komitetiniń ókilderi qyrǵi-qabaq edi. Munyń bárin kórip-bilip júrdim. Alaida bireýdi bireýge jyǵyp bergen kezim bolǵan joq. Birinshi kezekte memleket múddesin oiladym. Araz taraptardy tatýlastyrýǵa tyrystym. Jumysyma júrdim-bardym qaramadym, adal júrip, adal turdym”, – deidi Qaiyrbek Súleimenov.
Ázirlegen, Dýman BYQAI
