ونىڭ ايتۋىنشا 90-شى جىلدارى ەلدەگى قىلمىستىق احۋال كۇرت اسقىنىپ، جاعداي باقىلاۋدان شىعۋعا شاق تۇرعان. ۇكىمەت ىشكى ىستەر مينيسترلىگىنىڭ جۇمىسىنا كوڭىلى تولماي، سول تۇستا ۆەدومستۆوعا جەتەكشىلىك ەتكەن سۇلەيمەنوۆكە شۇيلىككەن.
“اتىن اتاماي-اق قويعانىم دۇرىس شىعار، پرەمەر-مينيسترلەردىڭ ءبىرى كابينەتىنە شاقىرىپ، مينيسترلىكتىڭ ۇيىمداسقان قىلمىستى اۋىزدىقتاي الماي وتىرعانىن بەتىمە باستى.
“ەلدە وپگ-لار ءورىپ ءجۇر. سەنىڭ قولىڭنان قايران دا كەلمەيدى. ودان دا سولاردىڭ اراسىنداعى سىي-قۇرمەتى بار دەگەندەردى، سونىڭ ىشىندە رىجيي المازدى بيلىككە اكەلەيىك، قارجىلاي قولداۋ كورسەتەيىك. سەنىڭ ورىنباسارىڭ بولسىن. ەرتەڭ بۇكىل ەلدى ۋىسىندا ۇستايتىن بولادى” دەدى.
ازىلدەگەن جوق، شىنىن ايتتى. وسىنداي جولمەن قىلمىس الەمىنىڭ وكىلدەرىن بيلىككە وتىرعىزعان كورشىلەس ەلدەردى ۇلگى ەتتى. بۇيىرا سويلەمەسە دە، مەنى وسى ۇسىنىسقا يلىكتىرگىسى كەلەتىن سىڭاي تانىتتى”، – دەيدى ول.
سۇلەيمەنوۆ ۇكىمەت باسشىسىنىڭ ۇسىنىسىن تىكسىنە قابىلداعان. رىجيي الماز بيلىككە كەلەر بولسا مۇنىڭ سوڭى قانتوگىسكە ۇلاسىپ، ەلدە كوررۋپسيا ەتەك الاتىنىن ەسكەرتكەن.
“رىجيي المازعا" ىشكى ىستەر مينيسترلىگىن تابىستار بولساڭىز، مەن تاپ ءقازىر وتستاۆكاعا كەتەمىن. بۇل قىزمەتتە ءبىر كۇن دە ايالدامايمىن” دەپ اشىق ايتتىم.
“سەنىڭ تاعدىرىڭدى شەشەتىن مەن ەمەس. ايتكەنمەن ءبىلىپ ءجۇر، سەنىڭ جۇمىسىڭا مۇلدەم كوڭىلىم تولمايدى” دەپ جاۋاپ قاتتى. ءالى كۇنگە دەيىن وسىنداي ءپاتۋاسىز، پارىقسىز ۇسىنىس بولادى ەكەن-اۋ دەپ تاڭعالامىن.
قولىن قانعا مالعان ادامعا تۇتاس مەملەكەتتىڭ، تۇرعىنداردىڭ تاعدىرىن سەنىپ تاپسىرۋ نونسەنس.
مۇنداي قىزمەتكە قىلمىس الەمىنىڭ سەركەسىن وتىرعىزىپ قويساق، ەرتەڭ جۇزدەگەن، مىڭداعان ادامنىڭ قانى توگىلەر ەدى عوي؟! مەن وعان جەكە كابينەت ءبولىپ، ءوزىمنىڭ ورىنباسارىم ەتىپ تاعايىنداعان كۇندە قىلمىسكەردىڭ سىبايلاسى بولعانىمنىڭ بەلگىسى ەمەس پە؟ جوق، مەن مۇندايعا بارا المايمىن. پرەمەرگە ءسوي دەپ جاۋاپ قاتتىم” – دەيدى سۇلەيمەنوۆ.
ەكس-مينيستر ۇكىمەتباسشىنىڭ ۇسىنىسىن نازاربايەۆقا جەتكىزبەك بولعان. مۇنى ەستىگەن پرەمەر سۇلەيمەنوۆكە وكپەلەپ قالعان.
“سونىڭ قولىڭنان كەلەرى سول عوي. قۇشاق-قۇشاق قۇجاتتى قولتىعىڭا قىسىپ، دوكلاد جاساۋدان وزگە بىلەرىڭ جوق. بار جۇگىر، جەتكىزىپ بار”، – دەدى. سونىمەن ءسوز ءتامام بولدى.
مەن ىشكى ىستەر مينيسترلىگىن باسقارعان تۇستا التى پرەمەر اۋىسىپ ۇلگەردى. ەشبىرىنەن قايمىققان جوقپىن، كۇش قۇرىلىمدارى ەلباسىعا عانا ەسەپ بەرەدى دەپ ەسەپتەدىم.
وسى كۇنگە دەيىنگى ازدى-كوپتى جەتىستىگىم ءۇشىن نازاربايەۆقا قارىزدارمىن. ەشبىرەۋدىڭ ۇستىنەن ارىز-شاعىم ايتىپ، پرەزيدەنتتىڭ الدىنا بارماعان ەكەنمىن. ال مەنىڭ ۇستىمنەن پوليسيانى جامانداپ، دومالاق ارىز جولداعان شەنەۋنىكتەردى سانامالار بولسام، ون ساۋساق تۇگەل بۇگىلەدى”، – دەيدى ول.
ەكس-مينيستر ءوزىنىڭ وسەك-اياڭنان ادا بولعانىن، كابينەت كەزىپ ءسوز تاسىماعانىن ايتىپ انت-سۋ ىشكەن ەكەن. ينتريگامەن اينالىسقاندى ۇناتپاعان. بيلىكتەگى ءتۇرلى-تۇرلى كلانداردىڭ كيكىلجىڭىنە ارالاسپاي، اۋلاق جۇرگەن.
“سوت پەن پروكۋراتۋرا وكىلدەرى ءجيى-جيى “ابالاسىپ” قالاتىن. پروكۋراتۋرا قىزمەتكەرلەرى مەن ۇلتتىق قاۋىپسىزدىك كوميتەتىنىڭ وكىلدەرى قىرعي-قاباق ەدى. مۇنىڭ ءبارىن كورىپ-بىلىپ ءجۇردىم. الايدا بىرەۋدى بىرەۋگە جىعىپ بەرگەن كەزىم بولعان جوق. ءبىرىنشى كەزەكتە مەملەكەت مۇددەسىن ويلادىم. اراز تاراپتاردى تاتۋلاستىرۋعا تىرىستىم. جۇمىسىما ءجۇردىم-باردىم قارامادىم، ادال ءجۇرىپ، ادال تۇردىم”، – دەيدى قايىربەك سۇلەيمەنوۆ.
ازىرلەگەن، دۋمان بىقاي
