Qazaqstanda ekonomikany ártaraptandyrý úshin óńdeý salasynyń qazirgi ósimi jetkiliksiz, sondyqtan Úkimet ónerkásipti jedeldetýge májbúr, dep habarlaidy Dala News.
Prezident Qasym-Jomart Toqaevtyń tóraǵalyǵymen ótken Úkimettiń keńeitilgen otyrysynda Premer-ministr Oljas Bektenov óńdeý ónerkásibin yntalandyrý sharalary týraly baiandady.
«Óńdeý ónerkásibiniń qazirgi ósim qarqyny ekonomikany tolyq ártaraptandyrý úshin jetkiliksiz. Sondyqtan óńdeýshi kásiporyndardyń damýyn yntalandyratyn jobalardy iske asyryp jatyrmyz», – dedi Oljas Bektenov.
Premer-ministrdiń aitýynsha, metallýrgiia, mashina jasaý jáne agroónerkásip kesheninde joǵary qaita óńdeý jobalary «Báiterek» holdingi arqyly qarjylandyrylyp jatyr.
«Salalyq ministrlikterge tereń óńdeý óndiristerin aldyn ala pysyqtaý mindeti qoiyldy. Jalpy, ótken jyly 200-den astam jańa ónerkásip nysany iske qosyldy, taǵy sonsha joba aiaqtalý satysynda tur», – dep atap ótti Úkimet basshysy.
Sonymen qatar, Bektenov óńdeý ónerkásibine investitsiia turaqty ósýi úshin el ekonomikasyn shikizatpen qamtamasyz etý sheshýshi faktor ekenin aitty. Osyǵan bailanysty geologiialyq barlaý jumystaryna erekshe nazar aýdarylady.
Onyń málimdeýinshe, 2025 jyly Qazaqstanda alǵash ret 1:50 000 aýqymyndaǵy jańa geologiialyq karta jasala bastady. Buǵan deiin el keńestik kezeńnen qalǵan 1:200 000 masshtabtaǵy derekterge súienip kelgen.
Prezident tapsyrmasyna sáikes, aldaǵy úsh jylda geologiialyq barlaýǵa memleket tarapynan shamamen $500 mln investitsiia salynady. Salystyrý úshin, sońǵy 30 jylda bul salaǵa bar bolǵany $760 mln baǵyttalǵan.
«100 myń sharshy shaqyrym aýmaqta eń perspektivaly ýchaskeler zertteledi – seismikalyq synaqtan bastap aerogeofizikaǵa deiin. Keiin jyl saiyn qosymsha 30 myń sharshy shaqyrym qamtylady», – dedi Premer-ministr.
Munymen qosa, salaǵa jeke investitsiialar da tartylyp jatyr. 2023 jyldan beri geologiialyq barlaýǵa jeke sektor $500 mln-nan astam qarjy quiǵan.
Úkimet osylaisha óńdeý ónerkásibin kúsheitý úshin bir mezette zaýyt salý, shikizat bazasyn keńeitý jáne investitsiialyq táýekeldi azaitý baǵytyn tańdady.
