Úkimet el aýmaǵyndaǵy 20-dan astam áýejaidy EýroOdaq elderiniń áleýetti investorlaryna bermekshi. Muny QR Kólik ministri Marat Qarabaev málim etti, – dep habarlaidy Dalanews.kz.
Jalpy, bul másele "EýroOdaq – Ortalyq Aziia" elderinde sóz bolǵanyn bilemiz. Biraq bul baǵyttaǵy jumystardy birden iske asyp ketedi dep eshkim oilmaǵany anyq.
Úkimettiń bul áreketin qarapaiym kópshilik quptamasy anyq. Óitkeni bizdegi halyqtyń kópshiligi investor dese kirpidei jiyrylatynyn bilemiz.
Halyqtyń investorlar jaiynda mundai kózqarasyna qalyptasýyna Nazarbaev rejiminiń qosqan «úlesi» zor. Bizdiń halyqqa investor deseńiz kóz aldyna Lakshmi Mittal elesteitini belgili.
Biraq qazirgi biliktiń sheteldik investorǵa berýden basqa amaly joq. Óitkeni elimizde áýejailarǵa qyzmet kórsetetin kompaniialar joq.
Bizdiń kompaniialar (shyndyǵynda oligarhtar degenimiz durys shyǵar) infraqurylymdyq nysandardy alyp alǵannan keiin ony damytyp, basyn aýyrtpaidy.
Olar tabystan túsken aqshadan nysandardy damytýǵa bir tiyn da jumsamai, toz-tozyn shyǵarady. Odan qalsa memleketke alaqan jaiyp, qazynanyń aqshasyna kóz súzýmen bolady.
Buǵan oligarh Aleksandr Klebanov sekildi oligarhtardyń is-áreketi aiqyn mysal bolady.
Kezinde Aleksandr Kelebanov Pavlodar oblysyndaǵy Jylytý qazandyqtaryn baýyryna basyp alyp, nysandy avariialyq jaǵdaiǵa jetkizgenin jurttyń bári biledi.
Keide olar toz-tozy shyqqan nysandardy memleketke qyraýar aqshaǵa satyp, izim-ǵaiym qarasyn batyrady. Sondyqtan ózimizdiń oligarh-investorlarǵa halyq senbeidi.
Desek te elimizdegi mańyzdy infraqurylymdyq nysandardy eýropalyq investorlarǵa berýden basqa amal joq.
Búginde Almatynyń áýejaiyn menshigine alǵan túrkiialyq investor áýe ailaǵyna aqsha quiyp keńeitip jatqanyn bilemiz. Sol siiaqty Astananyń áýejaiy da sheteldik investorlardyń qaraýyna ótip, jan-jaqty jumys isteýde.
Eń bastysy sheteldik investorlardyń Reseiden bolmaýyna basa mán berýimiz kerek. Óitkeni reseilik investorlardyń bizdiń Klebanovtardan esh aiyrmasy joq. Olar júrgen jerde jemqorlyq shyrmaýyqtai shyrmap alady.
Aitpaqsha, Kólik ministri Qarabaev Aqtaý jáne Quryq porty da EýroOdaq elderiniń kompaniialaryna beriletinin alǵa tartty.
