Atyraý oblysynda tórt adamnyń ólimine qatysty aiyptalyp jatqan Sultan Sársemálievtiń soty jalǵasyp jatyr. Kezekti otyrysta birneshe kýá jaýap berdi, dep habarlaidy dalanews.kz.
Sotta Munaishy yqshamaýdanyndaǵy úiin Sársemálievtiń otbasyna jalǵa bergen azamat ta kýálik etti. Onyń aitýynsha, otbasy bul baspanany 2023 jyldan bastap jaldap turǵan.
Kýágerdiń sózinshe, ai saiynǵy 50 myń teńge jaldaý aqysy belgisiz bir azamattyń atynan bank arqyly aýdarylyp otyrǵan. Alaida keibir kezeńderde otbasy úidi jaldamai qalǵan.
Úi iesi sotta ótken jyldyń 7 jeltoqsanynda Sultan Sársemálievpen sóileskenin aitty. Sol kezde aiyptalýshy áielin emdetip júrgenin aityp, endi úidi jaldamaitynyn jetkizgen.
Sýdia Zarema Hamidýllina kýágerdiń tergeý kezinde bergen jaýabyn oqyp berdi. Onda úi iesiniń baspanaǵa tek qajet bolǵan kezde ǵana baryp turǵany aitylǵan.
"Áielin bir-aq ret kórdim, onyń ózinde syrtynan ǵana baiqadym. Balalaryn múlde kórgen emespin. Áieli oramalda edi. Shamamen 27 jeltoqsanda úige baryp, esik aldyndaǵy tastyń astynda turǵan kiltterdi aldym. Úidiń ishin qaraǵanda eshqandai shashylǵan zattar nemese daqtar baiqalmady. Úidi tazalap ketkenin kórdim", – delingen kýágerdiń jaýabynda.
Sondai-aq kýáger sotta máiitti oraýǵa paidalanylǵan kilemniń ózine tiesili emes ekenin málimdedi. Onyń aitýynsha, úi aýlasyndaǵy dýshtyń ishinde eki kúrek pen bir aiyr turǵan.
