Túrkistan oblysynyń ákimi Janseıit Túımebaevtyń tóraǵalyǵymen oblys ákimdiginde keńeıtilgen májilis ótti. Kún tártibinde kópbalaly analar men jaǵdaıy tómen otbasylarǵa kómek berý máselesi qaraldy.
Basqosýda áleýmettik sala boıynsha atqarylyp jatqan jumystar týraly oblys ákiminiń orynbasary Erbol Sadyr baıandama jasady.
Málimetine sáıkes, 2018 jyly "Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» Memlekettik baǵdarlamasy" sheńberinde 69,7 myń adamǵa jumyspen qamtý sharalary kórsetilgen. Onyń ishinde, 29,4 myń adam nemese 42,2 paıyzy az qamtamasyz etilgen otbasylardyń azamattary qatarynan.
"2018 jyly oblys boıynsha 34389 otbasyǵa (195 620 adam) jalpy somasy 15 mlrd. 674,5 mln.teńge kóleminde ataýly áleýmettik kómek taǵaıyndaldy. Onyń ishinde, shartty aqshalaı kómek 30702 otbasyǵa (179 801 adam) 14 mlrd. 772,4 mln.teńge, al shartsyz aqshalaı kómek 3687 otbasyǵa (15 819 adam) 902,1 mln.teńge. Ataýly áleýmettik kómekpen qatar az qamtylǵan otbasylarǵa turǵyn úı kómegi kórsetilýde. 2018 jyly az qamtylǵan 4367 otbasyǵa (250 09 adam) 152,3 mln. teńgege turǵyn úı kómegi kórsetildi. Jalpy áleýmettik kómek alýshylardyń qataryndaǵy kópbalaly otbasylardyń úlesi 50 paıyzǵa jýyq (16,5 myń otbasy)", - dedi E.Sadyr.
Bul jumystardyń osy jyly da jalǵasyn tabatynyn aıtqan oblys ákiminiń orynbasary 2019 jyly ataýly áleýmettik kómek alýshylardyń sany 207,5 myń adamǵa josparlanyp, ataýly áleýmettik kómek boıynsha qarjy qajettiligi 13,6 mlrd.teńge quraıtynyn baıandady.
Onyń 50 paıyzy kópbalaly otbasylarǵa arnalǵan.
Munan soń, minberge oblystyq bilim basqarmasynyń basshysy Isataı Saǵyndyqov, densaýlyq saqtaý basqarmasynyń basshysy Muqan Egizbaev, oblystyq otbasy, balalar jáne jastar isteri jónindegi basqarmasynyń basshysy Balmarjan Narbekova shyǵyp, salalar boıynsha atqarylǵan jumystardyń barysyna toqtaldy. Saladaǵy jetistiktermen qatar, sheshimin tabýdy qajet etetin máselelerdi ońtaılandyrýda usynys-pikirlerin bildirdi.
Májilis sońyn oblys ákimi qorytyndylap, óńirdegi kópbalaly otbasylar týraly naqty aqparatty daıyndaýdan bastap, olarǵa kórsetiletin memlekettik, áleýmettik kómek túrleri syndy barlyq qoldaýlardy anyqtaýdy tapsyrdy.
"Ótinish bildirgen kópbalaly analardy jumyspen qamtýǵa járdem berýdi, kedeılik sheginen tómen otbasylarǵa jergilikti búdjet esebinen 5-10 AEK kóleminde materıaldyq kómek berý múmkindigin qarastyryp, naqty usynys engizýdi tapsyramyn.
Sonymen birge, mektepterge birińǵaı mektep formasyn engizip, onyń ishinde kópbalaly otbasylardan shyqqan oqýshylardy tegin formamen qamtamasyz etý boıynsha naqty usynys engizilsin.
Oblystyq búdjetten sýbsıdıalaý arqyly barlyq oqýshylarǵa 50 paıyz kóleminde arzandatylǵan tamaq uıymdastyrý, tamaqtaný kombınattaryn qurý boıynsha da usynystar ázirleńizder.
Munan bólek, barlyq medısınalyq mekemelerge «Kópbalaly analar kezeksiz qabyldanady» degen jarnamalar ornatýdy, barlyq aýrýhanalarda kópbalaly analarǵa arnaıy palata arnaýdy, sondaı-aq osy sanattaǵy analardy zań aıasynda aýrýhanalarǵa portalsyz jáne kezeksiz qabyldaný múmkindigin qarastyrýdy jáne sanatorıılerde em qabyldaý úshin zań aıasynda joldama bólýdi qarastyrýdy, sonymen qatar, qymbat medısınalyq qyzmetterdi kópbalaly analarǵa tegin kórsetý boıynsha múmkindikterdi qarastyryp, naqty usynys engizýdi tapsyramyn", - dedi J.Túımebaev.
Tapsyrmalarynyń ishinde aımaq basshysy memlekettik turǵyn úı qorynan úı alýǵa kópbalaly otbasylar tizimin anyqtap, birinshi kezekte úı berilý boıynsha usynys engizý jaıyn da umyt qaldyrǵan joq.
Sonymen birge, atalǵan sanattaǵy analardyń qoǵamdyq kólikterde «jeńildetilgen baǵamen júrý bıletterin» engizýdi nemese tegin tasymaldanýyn zańǵa sáıkes qarastyryp, tıisti usynys engizýdi de jaýapty mekeme basshylaryna júktedi.
