تۇركىستان وبلىسىنىڭ اكىمى جانسەيىت تۇيمەبايەۆتىڭ توراعالىعىمەن وبلىس اكىمدىگىندە كەڭەيتىلگەن ءماجىلىس ءوتتى. كۇن تارتىبىندە كوپبالالى انالار مەن جاعدايى تومەن وتباسىلارعا كومەك بەرۋ ماسەلەسى قارالدى.
باسقوسۋدا الەۋمەتتىك سالا بويىنشا اتقارىلىپ جاتقان جۇمىستار تۋرالى وبلىس اكىمىنىڭ ورىنباسارى ەربول سادىر بايانداما جاسادى.
مالىمەتىنە سايكەس، 2018 جىلى "ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى" شەڭبەرىندە 69،7 مىڭ ادامعا جۇمىسپەن قامتۋ شارالارى كورسەتىلگەن. ونىڭ ىشىندە، 29،4 مىڭ ادام نەمەسە 42،2 پايىزى از قامتاماسىز ەتىلگەن وتباسىلاردىڭ ازاماتتارى قاتارىنان.
"2018 جىلى وبلىس بويىنشا 34389 وتباسىعا (195 620 ادام) جالپى سوماسى 15 ملرد. 674،5 ملن.تەڭگە كولەمىندە اتاۋلى الەۋمەتتىك كومەك تاعايىندالدى. ونىڭ ىشىندە، شارتتى اقشالاي كومەك 30702 وتباسىعا (179 801 ادام) 14 ملرد. 772،4 ملن.تەڭگە، ال شارتسىز اقشالاي كومەك 3687 وتباسىعا (15 819 ادام) 902،1 ملن.تەڭگە. اتاۋلى الەۋمەتتىك كومەكپەن قاتار از قامتىلعان وتباسىلارعا تۇرعىن ءۇي كومەگى كورسەتىلۋدە. 2018 جىلى از قامتىلعان 4367 وتباسىعا (250 09 ادام) 152،3 ملن. تەڭگەگە تۇرعىن ءۇي كومەگى كورسەتىلدى. جالپى الەۋمەتتىك كومەك الۋشىلاردىڭ قاتارىنداعى كوپبالالى وتباسىلاردىڭ ۇلەسى 50 پايىزعا جۋىق (16،5 مىڭ وتباسى)"، - دەدى ە.سادىر.
بۇل جۇمىستاردىڭ وسى جىلى دا جالعاسىن تاباتىنىن ايتقان وبلىس اكىمىنىڭ ورىنباسارى 2019 جىلى اتاۋلى الەۋمەتتىك كومەك الۋشىلاردىڭ سانى 207،5 مىڭ ادامعا جوسپارلانىپ، اتاۋلى الەۋمەتتىك كومەك بويىنشا قارجى قاجەتتىلىگى 13،6 ملرد.تەڭگە قۇرايتىنىن باياندادى.
ونىڭ 50 پايىزى كوپبالالى وتباسىلارعا ارنالعان.
مۇنان سوڭ، مىنبەرگە وبلىستىق ءبىلىم باسقارماسىنىڭ باسشىسى يساتاي ساعىندىقوۆ، دەنساۋلىق ساقتاۋ باسقارماسىنىڭ باسشىسى مۇقان ەگىزبايەۆ، وبلىستىق وتباسى، بالالار جانە جاستار ىستەرى جونىندەگى باسقارماسىنىڭ باسشىسى بالمارجان ناربەكوۆا شىعىپ، سالالار بويىنشا اتقارىلعان جۇمىستاردىڭ بارىسىنا توقتالدى. سالاداعى جەتىستىكتەرمەن قاتار، شەشىمىن تابۋدى قاجەت ەتەتىن ماسەلەلەردى وڭتايلاندىرۋدا ۇسىنىس-پىكىرلەرىن ءبىلدىردى.
ءماجىلىس سوڭىن وبلىس اكىمى قورىتىندىلاپ، وڭىردەگى كوپبالالى وتباسىلار تۋرالى ناقتى اقپاراتتى دايىنداۋدان باستاپ، ولارعا كورسەتىلەتىن مەملەكەتتىك، الەۋمەتتىك كومەك تۇرلەرى سىندى بارلىق قولداۋلاردى انىقتاۋدى تاپسىردى.
"ءوتىنىش بىلدىرگەن كوپبالالى انالاردى جۇمىسپەن قامتۋعا جاردەم بەرۋدى، كەدەيلىك شەگىنەن تومەن وتباسىلارعا جەرگىلىكتى بيۋدجەت ەسەبىنەن 5-10 اەك كولەمىندە ماتەريالدىق كومەك بەرۋ مۇمكىندىگىن قاراستىرىپ، ناقتى ۇسىنىس ەنگىزۋدى تاپسىرامىن.
سونىمەن بىرگە، مەكتەپتەرگە ءبىرىڭعاي مەكتەپ فورماسىن ەنگىزىپ، ونىڭ ىشىندە كوپبالالى وتباسىلاردان شىققان وقۋشىلاردى تەگىن فورمامەن قامتاماسىز ەتۋ بويىنشا ناقتى ۇسىنىس ەنگىزىلسىن.
وبلىستىق بيۋدجەتتەن سۋبسيديالاۋ ارقىلى بارلىق وقۋشىلارعا 50 پايىز كولەمىندە ارزانداتىلعان تاماق ۇيىمداستىرۋ، تاماقتانۋ كومبيناتتارىن قۇرۋ بويىنشا دا ۇسىنىستار ازىرلەڭىزدەر.
مۇنان بولەك، بارلىق مەديسينالىق مەكەمەلەرگە «كوپبالالى انالار كەزەكسىز قابىلدانادى» دەگەن جارنامالار ورناتۋدى، بارلىق اۋرۋحانالاردا كوپبالالى انالارعا ارنايى پالاتا ارناۋدى، سونداي-اق وسى ساناتتاعى انالاردى زاڭ اياسىندا اۋرۋحانالارعا پورتالسىز جانە كەزەكسىز قابىلدانۋ مۇمكىندىگىن قاراستىرۋدى جانە ساناتورييلەردە ەم قابىلداۋ ءۇشىن زاڭ اياسىندا جولداما ءبولۋدى قاراستىرۋدى، سونىمەن قاتار، قىمبات مەديسينالىق قىزمەتتەردى كوپبالالى انالارعا تەگىن كورسەتۋ بويىنشا مۇمكىندىكتەردى قاراستىرىپ، ناقتى ۇسىنىس ەنگىزۋدى تاپسىرامىن"، - دەدى ج.تۇيمەبايەۆ.
تاپسىرمالارىنىڭ ىشىندە ايماق باسشىسى مەملەكەتتىك تۇرعىن ءۇي قورىنان ءۇي الۋعا كوپبالالى وتباسىلار ءتىزىمىن انىقتاپ، ءبىرىنشى كەزەكتە ءۇي بەرىلۋ بويىنشا ۇسىنىس ەنگىزۋ جايىن دا ۇمىت قالدىرعان جوق.
سونىمەن بىرگە، اتالعان ساناتتاعى انالاردىڭ قوعامدىق كولىكتەردە «جەڭىلدەتىلگەن باعامەن ءجۇرۋ بيلەتتەرىن» ەنگىزۋدى نەمەسە تەگىن تاسىمالدانۋىن زاڭعا سايكەس قاراستىرىپ، ءتيىستى ۇسىنىس ەنگىزۋدى دە جاۋاپتى مەكەمە باسشىلارىنا جۇكتەدى.
