Belgili jýrnalıs Áset Mataev azaptaý baby boıynsha ustalǵan burynǵy general Talǵat Tatýbaevqa qatysty óziniń basynan ótken oqıǵany eske aldy. Ol bul týraly áleýmettik jelidegi paraqshasynda jazdy, dep habarlaıdy Dalanews.kz.

Jýrnalıstiń sózinshe, 2016 jyly ol qarjy polısıasy basshysynyń orynbasary Talǵat Tatýbaevpen eki ret kezdesken. Sol kezde fınpol ókili Mataevtar otbasyna Qylmystyq kodekstiń 65-baby (kinásin moıyndap, shyn ókingeni úshin jaýapkershilikten bosatý) boıynsha kináni moıyndaýdy usynǵan.

«Sol kezde ákem ekeýmizge jalǵan aıyp taǵylyp jatqanyn aıttym. Logıkalyq argýmentterimdi estigende, onyń kózi jypylyqtap ketti. Sol sátte onyń «zań adamy» emes, qarapaıym kóshe adamy sıaqty sóılep turǵanyn túsindim. Áńgimesiniń bar mazmuny – «joǵarydan tapsyrys tústi, báribir túrmege jabylasyńdar» degenge saıdy», – dep eske alady Áset Mataev.

Jýrnalısiń aıtýynsha, sol is boıynsha birneshe tanymal tulǵa – Joǵarǵy sottyń sol kezdegi baspasóz hatshysy Bolat Kalánbekov (qazirgi Májilis apparaty basshysynyń orynbasary), «Qazaqtelekomnyń» vıse-prezıdenti Mahanbetajıev, Aqparat komıtetiniń burynǵy tóraǵasy Bersebaev sekildi sheneýnikter qamaýǵa alynǵan. Biraq olar qysymǵa tótep bere almaı, bir kún tergeý ızolátorynda otyrǵan soń, qarjy polısıasy qoıǵan sharttarǵa kelisken.

«Olardyń barlyǵy bir-bir kún tergeý ızolátorynda bolyp, bizge jala jabýǵa májbúr boldy. İs júzinde bılik pen fınpoldyń talabyna kóngen adamdar edi. Olardyń birazy Nurlan Nyǵmatýlın, Baǵlan Maılybaev, Baýyrjan Baıbek, Asqar Jumaǵalıev sekildi tulǵalarǵa jaqyn adamdar bolatyn», – dep jazdy jýrnalıs.

Sondaı-aq ol Joǵarǵy sottyń sol kezdegi baspasóz hatshysy Bolat Kalánbekovtiń keıinirek belgili quqyq qorǵaýshy, «Ádil sóz» qorynyń jetekshisi Tamara Kaleevaǵa habarlasyp, Mataevtardy kináni moıyndaýǵa kóndirýin suraǵanyn atap ótti. Mataevtyń aıtýynsha, Kalánbekovtyń ústinen qozǵalǵan is 2021 jyly Qańtar oqıǵasynyń aldynda jabylyp qalǵan.

«Men ol kezde otbasym men jaqyndarymnyń qysymǵa ushyraǵanyna kýá boldym. Ákemdi qamaýǵa alyp, keıin maǵan telefon arqyly shyǵyp, «eshteńege ýaıymdama, is jabylady, bári shıki ekenin biledi» dep sendirdi. Árıne, sózine turmady. Ákemdi de, otbasymdy da, qyzmetkerlerimizdi de úkimge deıin qınady», – deıdi ol.

Áset Mataev ákesiniń túrmeden shyqqan soń, medıaforýmda «Tengrınús» jetekshisi Batyr Qazybaevtyń kelip, keshirim suraǵanyn da aıtty. Qazybaev aqparat quralynda Mataevtarǵa qarsy materıaldar shyǵarý týraly tapsyrmany joǵarydan alǵanyn moıyndaǵan.

Jýrnalıs bul jazbany kek alý maqsatynda emes, quqyq qorǵaý organdarynyń qyzmetkerleri óz bolashaǵyn oılansyn degen nıetpen jarıalaǵanyn atap ótti.

«Meniń jazǵanym – tek ótkennen sabaq alý. Tergeýshiler, prokýrorlar, sýdıalar bolashaǵyn oılasyn. Býmerańtyń keri aınalyp soǵatyn sáti de bar. Tatýbaevtyń otbasyna densaýlyq pen sabyrlyq tileımin. Olar da endi tergeý ızolátorynyń aldynda ystyq pen sýyqqa tózip, jaqyndaryna tamaq aparýdyń qandaı ekenin bilsin. Býmerań zańdylyǵy eshkimdi aınalyp ótpeıdi», – dedi Áset Mataev.

Qazir Talǵat Tatýbaevqa qatysty azaptaý baby boıynsha tergeý júrip jatyr.