Túrkistan oblysynda respýblikalyq mańyzy bar jol boiynda ornalasqan sanitarlyq-gigienalyq toraptar jańartylyp, talapqa keltiriledi. Bul másele oblys ákimi Darhan Satybaldynyń tóraǵalyǵymen ótken jinalysta talqylandy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Týrizmdi damytý úshin jol boiyndaǵy sanitarlyq-gigienalyq nysandar talapqa sai bolýy tiis. Tolyq zerdelep, naqty usynys berińizder. Jolaýshylarǵa da, týristerge de jol boiynda sapaly qyzmet kórsetý kerek, – degen oblys ákimi jaýaptylarǵa tiisti tapsyrmalar berdi.
Óńir basshysynyń tapsyrmasymen oblystaǵy respýblikalyq mańyzy bar jol boiynda ornalasqan sanitarlyq-gigienalyq toraptardyń jaǵdaiyna monitoring jumystary júrgizildi. Atap aitqanda, «Túrkistan – Shymkent», «Shymkent – Jambyl oblysy», «Shymkent – «Jibek joly» beketi baǵyttary tekserilgen. Qazirgi tańda, atalǵan baǵyttaǵy avtomobil joldarynda jalpy sany 102 sanitarlyq-gigienalyq torap jumys atqarýda. Onyń ishinde: 52 ájethana janar-jaǵar mai quiý beketterinde, 28 ájethana jol boiyndaǵy servis nysandarynda, 22 ájethana jeke ornalasqan.
Jiynda 11 orynda ájethanalardy buzyp, ornyna jańa ári sanitarlyq talaptarǵa sai nysan ornatý týraly usynys berildi. Týrizm basqarmasy tarapynan aqparattyq dúńgirshik pen ájethanamen qamtylǵan 3 modýldik nysan ornatý týraly da usynys qaraldy. Sonymen birge oblysqa kireberis joldar boiynda aimaqtyń týristik áleýeti boiynsha aqparat beretin úlken aqparattyq stendter ornatý ideiasy aityldy. Aqparattyq stendte oblystyń týristik oryndary kórsetilgen karta jáne týristik nysandar boiynsha málimet úsh tilde jazylady dep kózdelgen.
