Týrizm indýstriiasyn damytý jónindegi paneldik sessiiaǵa alys-jaqyn shetelden kelgen spikerler baiandama jasap, taldaýlaryn usyndy. Saladaǵy tájiribeli tulǵalar men sarapshylar Qazaqstandaǵy týrizmdi jan-jaqty ilgeriletý tásilderin talqylady.
Sessiianyń modertory ári spikeri DARS Consulting (Ulybritaniia) kompaniiasynyń direktory, Eýraziiadaǵy BBC Global News kommertsiialyq ókildiginiń basshysy Sergei Stanovkin «Aimaqtyń týristik brendi» taqyrybynda sóz qozǵady.
Kontent pen kommýnikatsiianyń sapasy, áleýmettik jelimen jumys, jarnama jasaý boiynsha analiz jasalǵan prezentatsiiasyn tanystyrdy.
Túrkistan oblysy ákiminiń orynbasary Beisen Tájibaev óńirdiń erekshelikterine toqtalyp, josparlarmen bólisti.
– Túrki halyqtarynyń mádeni jáne rýhani mekeni, tarihtan keleshekke baǵyt alǵan Túrkistan qalasyna qosh keldińizder! Qazaq handyǵynyń 200 jyldai astanasy bolǵan Túrkistannyń tarihy 1500 jyldan astam ýaqytty qamtidy. Al óńir ekonomikasyndaǵy basym baǵyttyń biri týrizm salasy bolyp aiqyndalǵan. 2021 jyly Túrkitildes memleketterdiń yntymaqtastyq keńesiniń VIII beiresmi sammitinde taraptar Túrkistandy túrki áleminiń rýhani astanasy dep ataý týraly deklaratsiiaǵa qol qoidy. Bul qujat – Túrkistannyń rýhani-mádeni baǵytta damýyna oń serpin berip keledi.
«Kazakh Tourism» UQ Basqarýshy direktory Daniel Serjanuly «Týrizmdegi kommýnikatsiia» taqyrybynda pikir bildirdi.
Ol salanyń qýatty jáne álsiz jaqtaryn taldaý, maqsatty naryqtardyń qoljetimdiligi, Ortalyq Aziiadaǵy trend, týristik aǵyndardyń almasýy, álemdegi joǵary básekelestik, elder arasyndaǵy logistikanyń tómendigi, biryńǵai saiasattyń bolmaýy týraly aitty.
Spikerdiń aitýynsha kieli Túrkistan ólkesiniń tanymaldylyǵy – Uly Jibek joly týrmarshrýty negizinde artyp keledi. Bul tusta álemdik tájiribeni beiimdeý, týristerdi qabyldaý júiesin qurý, biryńǵai navigatsiia júiesi, týrmarshrýt sertifikaty, tsifrlandyrý men geimifikatsiia qyzmetterin qolǵa alý qajet.
