تۋريزم يندۋسترياسىن دامىتۋ جونىندەگى پانەلدىك سەسسياعا الىس-جاقىن شەتەلدەن كەلگەن سپيكەرلەر بايانداما جاساپ، تالداۋلارىن ۇسىندى. سالاداعى تاجىريبەلى تۇلعالار مەن ساراپشىلار قازاقستانداعى ءتۋريزمدى جان-جاقتى ىلگەرىلەتۋ تاسىلدەرىن تالقىلادى.
سەسسيانىڭ مودەرتورى ءارى سپيكەرى DARS Consulting (ۇلىبريتانيا) كومپانياسىنىڭ ديرەكتورى، ەۋرازياداعى BBC Global News كوممەرسيالىق وكىلدىگىنىڭ باسشىسى سەرگەي ستانوۆكين «ايماقتىڭ تۋريستىك برەندى» تاقىرىبىندا ءسوز قوزعادى.
كونتەنت پەن كوممۋنيكاسيانىڭ ساپاسى، الەۋمەتتىك جەلىمەن جۇمىس، جارناما جاساۋ بويىنشا اناليز جاسالعان پرەزەنتاسياسىن تانىستىردى.
تۇركىستان وبلىسى اكىمىنىڭ ورىنباسارى بەيسەن تاجىبايەۆ ءوڭىردىڭ ەرەكشەلىكتەرىنە توقتالىپ، جوسپارلارمەن ءبولىستى.
– تۇركى حالىقتارىنىڭ مادەني جانە رۋحاني مەكەنى، تاريحتان كەلەشەككە باعىت العان تۇركىستان قالاسىنا قوش كەلدىڭىزدەر! قازاق حاندىعىنىڭ 200 جىلداي استاناسى بولعان تۇركىستاننىڭ تاريحى 1500 جىلدان استام ۋاقىتتى قامتيدى. ال ءوڭىر ەكونوميكاسىنداعى باسىم باعىتتىڭ ءبىرى تۋريزم سالاسى بولىپ ايقىندالعان. 2021 جىلى تۇركىتىلدەس مەملەكەتتەردىڭ ىنتىماقتاستىق كەڭەسىنىڭ VIII بەيرەسمي سامميتىندە تاراپتار تۇركىستاندى تۇركى الەمىنىڭ رۋحاني استاناسى دەپ اتاۋ تۋرالى دەكلاراسياعا قول قويدى. بۇل قۇجات – تۇركىستاننىڭ رۋحاني-مادەني باعىتتا دامۋىنا وڭ سەرپىن بەرىپ كەلەدى.
بيىل تۇركى مەملەكەتتەرى ۇيىمىنىڭ كەڭەسۋىمەن تۇركىستان قالاسى – 2024 جىلى تۇركى مەملەكەتتەرىنىڭ تۋريستىك استاناسى اتاندى. بۇگىنگى مەملەكەتتىك ۇيىمداردىڭ، تۋريستىك قاۋىمداستىق وكىلدەرىن، الەۋەتتى ينۆەستورلاردى باسىن بىرىكتىرگەن تۋريزم باعىتىنداعى جوعارى دەڭگەيدەگى كەزدەسۋلەر مەن كەلىسىمدەر تۇركىستانعا تىڭ سەرپىن بەرەدى. جاڭا تۇركىستان تۋريزم ورتالىعىنا اينالادى دەپ سەنەمىن، – دەدى بەيسەن داۋلەت ۇلى.
«Kazakh Tourism» ۇق باسقارۋشى ديرەكتورى دانيەل سەرجان ۇلى «تۋريزمدەگى كوممۋنيكاسيا» تاقىرىبىندا پىكىر ءبىلدىردى.
ول سالانىڭ قۋاتتى جانە ءالسىز جاقتارىن تالداۋ، ماقساتتى نارىقتاردىڭ قولجەتىمدىلىگى، ورتالىق ازياداعى ترەند، تۋريستىك اعىنداردىڭ الماسۋى، الەمدەگى جوعارى باسەكەلەستىك، ەلدەر اراسىنداعى لوگيستيكانىڭ تومەندىگى، ءبىرىڭعاي ساياساتتىڭ بولماۋى تۋرالى ايتتى.
سپيكەردىڭ ايتۋىنشا كيەلى تۇركىستان ولكەسىنىڭ تانىمالدىلىعى – ۇلى جىبەك جولى تۋرمارشرۋتى نەگىزىندە ارتىپ كەلەدى. بۇل تۇستا الەمدىك تاجىريبەنى بەيىمدەۋ، تۋريستەردى قابىلداۋ جۇيەسىن قۇرۋ، ءبىرىڭعاي ناۆيگاسيا جۇيەسى، تۋرمارشرۋت سەرتيفيكاتى، سيفرلاندىرۋ مەن گەيميفيكاسيا قىزمەتتەرىن قولعا الۋ قاجەت.
سەسسيا بارىسىندا YDA Group باس ديرەكتورى جانە ديرەكتورلار كەڭەسىنىڭ مۇشەسى احمەت حامدي گيۋۆەنچ، حالىقارالىق تۋريزم جانە مەيماندوستىق ۋنيۆەرسيتەتى باسقارما ءتوراعاسىنىڭ مىندەتىن اتقارۋشى قارلىعاش ارالبەكوۆا، كاسىپكەر ءارى ينفليۋەنسەر ومار سابينا، تۇركىستان وبلىسى مادەنيەت جانە تۋريزم باسقارماسىنىڭ باسشىسى ءازىمحان قويلىبايەۆ، «Freedom Finance Global» تالداۋشىسى، سالالىق زەرتتەۋلەردىڭ اۆتورى اڭسار ابۋيەۆ، «Silk Road» جوباسىنىڭ جەتەكشىسى ايناش ەرىمبەتوۆا تۋريستىك نارىقتىڭ زەرتتەلۋى، ينفراقۇرىلىم، كولىك قاتىناسى، وقيعالىق تۋريزم، قازىرگى سىن قاتەرلەر مەن مۇمكىندىكتەر، كادرلار دايارلاۋ جايىندا پىكىرلەرىن ورتاعا سالدى. سەسسيا سپيكەرلەر مەن قاتىسۋشىلار اراسىنداعى تالقىلاۋمەن قورىتىندىلاندى.
