Shyǵys Qazaqstan oblysynyń ákimi Nurymbet Saqtaǵanov Kúrshim aýdanynyń halqymen kezdesti. Kezdesý barysynda óńir basshysy ekonomikany damytý, infraqurylymdy jetildirý jáne áleýmettik máselelerdi sheshý syndy negizgi taqyryptardy qozǵady, dep habarlaidy Dalanews.kz.
Aimaq basshysy alǵashqy jartyjyldyq qorytyndysy boiynsha áleýmettik-ekonomikalyq damýda jalpy oń dinamika baiqalatynyn atap ótti. Jumyssyzdyq deńgeii 4,6% bolǵan jaǵdaida munda 10 myń jańa jumys orny qurylǵan. Al ortasha ailyq jalaqy shamamen 9%-ǵa ósip, 407 myń teńgeni qurady. Jergilikti turǵyndarǵa Nurymbet Saqtaǵanov kelesidei málimdedi:
«2029 jylǵa deiin Kúrshim aýdanynyń damýyna 28,3 mlrd teńge biýdjet qarajaty men 19 mlrd teńgeden astam jeke investitsiia tartý josparlanyp otyr. Bul aimaqtyń týristik áleýeti joǵary, sondyqtan ony damytý qajet. Al aýyl sharýashylyǵy salasyna keler bolsaq, bul aýdannyń úlesi oblys ekonomikasynyń 4%-yn quraidy», – dedi ol.
ShQO ákiminiń aitýynsha, Kúrshim aýdanynda negizinen mal sharýashylyǵy damyǵan. Osyǵan bailanysty veterinariialyq qyzmettiń materialdyq-tehnikalyq jabdyqtalýyna airyqsha nazar aýdarylyp otyr. Jaqynda oblystyq veterinarlardyń avtoparki tolyq jańartyldy. Sondai-aq, Kúrshim aýylynda ainalma jol salý josparlanýda – bul maqsatqa respýblikalyq biýdjetten 900 million teńge bólindi.
Sýmen jabdyqtaý, densaýlyq saqtaý jáne basqa da áleýmettik mańyzy bar máseleler Nurymbet Saqtaǵanovtyń turǵyndarmen kezdesýi men jeke qabyldaýy kezinde talqylandy.
Sodan keiin óńir basshysy kúrdeli jóndeýden ótken jergilikti mektepti, «Qazposhta» qazandyǵyn qarap, balyq sharýashylyǵynyń jumysymen tanysty. Aita ketý kerek, Kúrshim aýdany – Qazaqstanda ǵana emes, shet elderge de balyq jiberetin iri jetkizýshilerdiń biri. ShQO ákimi barǵan «Tóre Toǵam» JShS jyl saiyn sý aidyndaryna ártúrli balyq túrlerin jiberip otyrady.
«Meniń oiymsha, bul aýdannyń balyq sharýashylyǵy – elimizdiń ekonomikasyndaǵy naǵyz draiver», – dep atap ótti Nurymbet Saqtaǵanov.
Kezdesý qorytyndysy boiynsha ShQO ákimi birqatar mindetterdi aiqyndap, mańyzdy salalardaǵy kooperatsiia máselelerin talqylady.
