شىعىس قازاقستان وبلىسىنىڭ اكىمى نۇرىمبەت ساقتاعانوۆ كۇرشىم اۋدانىنىڭ حالقىمەن كەزدەستى. كەزدەسۋ بارىسىندا ءوڭىر باسشىسى ەكونوميكانى دامىتۋ، ينفراقۇرىلىمدى جەتىلدىرۋ جانە الەۋمەتتىك ماسەلەلەردى شەشۋ سىندى نەگىزگى تاقىرىپتاردى قوزعادى، دەپ حابارلايدى Dalanews.kz.
ايماق باسشىسى العاشقى جارتىجىلدىق قورىتىندىسى بويىنشا الەۋمەتتىك-ەكونوميكالىق دامۋدا جالپى وڭ ديناميكا بايقالاتىنىن اتاپ ءوتتى. جۇمىسسىزدىق دەڭگەيى 4،6% بولعان جاعدايدا مۇندا 10 مىڭ جاڭا جۇمىس ورنى قۇرىلعان. ال ورتاشا ايلىق جالاقى شامامەن 9%-عا ءوسىپ، 407 مىڭ تەڭگەنى قۇرادى. جەرگىلىكتى تۇرعىندارعا نۇرىمبەت ساقتاعانوۆ كەلەسىدەي مالىمدەدى:
«2029 جىلعا دەيىن كۇرشىم اۋدانىنىڭ دامۋىنا 28،3 ملرد تەڭگە بيۋدجەت قاراجاتى مەن 19 ملرد تەڭگەدەن استام جەكە ينۆەستيسيا تارتۋ جوسپارلانىپ وتىر. بۇل ايماقتىڭ تۋريستىك الەۋەتى جوعارى، سوندىقتان ونى دامىتۋ قاجەت. ال اۋىل شارۋاشىلىعى سالاسىنا كەلەر بولساق، بۇل اۋداننىڭ ۇلەسى وبلىس ەكونوميكاسىنىڭ 4%-ىن قۇرايدى»، – دەدى ول.
شقو اكىمىنىڭ ايتۋىنشا، كۇرشىم اۋدانىندا نەگىزىنەن مال شارۋاشىلىعى دامىعان. وسىعان بايلانىستى ۆەتەريناريالىق قىزمەتتىڭ ماتەريالدىق-تەحنيكالىق جابدىقتالۋىنا ايرىقشا نازار اۋدارىلىپ وتىر. جاقىندا وبلىستىق ۆەتەرينارلاردىڭ اۆتوپاركى تولىق جاڭارتىلدى. سونداي-اق، كۇرشىم اۋىلىندا اينالما جول سالۋ جوسپارلانۋدا – بۇل ماقساتقا رەسپۋبليكالىق بيۋدجەتتەن 900 ميلليون تەڭگە ءبولىندى.
سۋمەن جابدىقتاۋ، دەنساۋلىق ساقتاۋ جانە باسقا دا الەۋمەتتىك ماڭىزى بار ماسەلەلەر نۇرىمبەت ساقتاعانوۆتىڭ تۇرعىندارمەن كەزدەسۋى مەن جەكە قابىلداۋى كەزىندە تالقىلاندى.
سودان كەيىن ءوڭىر باسشىسى كۇردەلى جوندەۋدەن وتكەن جەرگىلىكتى مەكتەپتى، «قازپوشتا» قازاندىعىن قاراپ، بالىق شارۋاشىلىعىنىڭ جۇمىسىمەن تانىستى. ايتا كەتۋ كەرەك، كۇرشىم اۋدانى – قازاقستاندا عانا ەمەس، شەت ەلدەرگە دە بالىق جىبەرەتىن ءىرى جەتكىزۋشىلەردىڭ ءبىرى. شقو اكىمى بارعان «تورە توعام» ج ش س جىل سايىن سۋ ايدىندارىنا ءارتۇرلى بالىق تۇرلەرىن جىبەرىپ وتىرادى.
«مەنىڭ ويىمشا، بۇل اۋداننىڭ بالىق شارۋاشىلىعى – ەلىمىزدىڭ ەكونوميكاسىنداعى ناعىز درايۆەر»، – دەپ اتاپ ءوتتى نۇرىمبەت ساقتاعانوۆ.
كەزدەسۋ قورىتىندىسى بويىنشا شقو اكىمى ءبىرقاتار مىندەتتەردى ايقىنداپ، ماڭىزدى سالالارداعى كووپەراسيا ماسەلەلەرىن تالقىلادى.
