Qazaqstannyń túzeý mekemelerinde jazasyn ótep jatqan azamattar dron óndirý isine qatysa bastady. Bul týraly Ishki ister ministrligine qarasty “Eńbek” respýblikalyq memlekettik kásipornynyń direktory Ermek Shormanov málimdedi, dep habarlaidy Dalanews.kz.
Onyń aitýynsha, Aqmola oblysyndaǵy Arshaly eldi mekeninde ornalasqan túzeý mekemesiniń aýmaǵynda arnaiy angar jóndelip, qajetti óndiristik stanoktar ornatylǵan. Joba aiasynda sottalǵandar drondardy tek jinaqtaýmen shektelmei, olardy tolyq óndiristik tsikl boiynsha jasaýǵa tartylady.
Ermek Shormanovtyń sózinshe, ushqyshsyz ushý apparattarynyń korpýsy mekeme aýmaǵynda daiyndalady. Elektrondy platalar men baǵdarlamalyq qamtamasyz etý de osy jerde ázirlenedi. Óndiris protsesine qatysatyn jazasyn óteýshiler aldyn ala oqytýdan ótip, qaýipsizdik talaptaryna sai jumys isteidi.
Mekeme basshysy bul bastamanyń negizgi maqsaty – sottalǵandardy eńbekke beiimdeý, kásibi daǵdylaryn arttyrý jáne bosap shyqqannan keiin olardyń qoǵamǵa qaita sátti beiimdelýine jaǵdai jasaý ekenin atap ótti.
Qylmystyq-atqarý júiesinde dron óndirisiniń iske qosylýy eńbekpen qamtýdyń jańa baǵyty retinde baǵalanyp otyr. Joba sottalǵandardy resotsializatsiialaýmen qatar, otandyq óndiristiń damýyna da úles qospaq.
