قازاقستاننىڭ تۇزەۋ مەكەمەلەرىندە جازاسىن وتەپ جاتقان ازاماتتار درون ءوندىرۋ ىسىنە قاتىسا باستادى. بۇل تۋرالى ىشكى ىستەر مينيسترلىگىنە قاراستى “ەڭبەك” رەسپۋبليكالىق مەملەكەتتىك كاسىپورنىنىڭ ديرەكتورى ەرمەك شورمانوۆ مالىمدەدى، دەپ حابارلايدى Dalanews.kz.
ونىڭ ايتۋىنشا، اقمولا وبلىسىنداعى ارشالى ەلدى مەكەنىندە ورنالاسقان تۇزەۋ مەكەمەسىنىڭ اۋماعىندا ارنايى انگار جوندەلىپ، قاجەتتى وندىرىستىك ستانوكتار ورناتىلعان. جوبا اياسىندا سوتتالعاندار درونداردى تەك جيناقتاۋمەن شەكتەلمەي، ولاردى تولىق وندىرىستىك سيكل بويىنشا جاساۋعا تارتىلادى.
ەرمەك شورمانوۆتىڭ سوزىنشە، ۇشقىشسىز ۇشۋ اپپاراتتارىنىڭ كورپۋسى مەكەمە اۋماعىندا دايىندالادى. ەلەكتروندى پلاتالار مەن باعدارلامالىق قامتاماسىز ەتۋ دە وسى جەردە ازىرلەنەدى. ءوندىرىس پروسەسىنە قاتىساتىن جازاسىن وتەۋشىلەر الدىن الا وقىتۋدان ءوتىپ، قاۋىپسىزدىك تالاپتارىنا ساي جۇمىس ىستەيدى.
مەكەمە باسشىسى بۇل باستامانىڭ نەگىزگى ماقساتى – سوتتالعانداردى ەڭبەككە بەيىمدەۋ، كاسىبي داعدىلارىن ارتتىرۋ جانە بوساپ شىققاننان كەيىن ولاردىڭ قوعامعا قايتا ءساتتى بەيىمدەلۋىنە جاعداي جاساۋ ەكەنىن اتاپ ءوتتى.
قىلمىستىق-اتقارۋ جۇيەسىندە درون ءوندىرىسىنىڭ ىسكە قوسىلۋى ەڭبەكپەن قامتۋدىڭ جاڭا باعىتى رەتىندە باعالانىپ وتىر. جوبا سوتتالعانداردى رەسوسياليزاسيالاۋمەن قاتار، وتاندىق ءوندىرىستىڭ دامۋىنا دا ۇلەس قوسپاق.
