Túrkiiada "Qazaqstan – ulylardyń otany" atty velosaiahat uiymdastyrylady
Jalpy qashyqtyq – 2500 shaqyrymdy quraidy. Joba – el Táýelsizdiginiń 30 jyldyǵyna arnalyp otyr. «Turan-TV» telearnasy saiahatty túgel taspaǵa túsirip, kórermen nazaryna usynatyn bolady. Bul týraly brifingte telearna direktory Roman Botabekov málimdedi.
Volonter Damir Kósheev atalǵan saiahat eki eldiń dostyǵy men baýyrlastyǵyna arnalatyndyǵyn jetkizdi.
– Túrkiia – elimizdiń egemendigin alǵash moiyndaǵan baýyrlas memleket. Otyz jyl boiy dostyq qarym-qatynas jasap kelemiz. Túrik aǵaiyndar uly aqynymyz Abaiǵa arnap saiabaq, eskertkish ornatty. Bul el men tulǵalarǵa degen qurmet. Bizdiń saiahattyń taǵy bir maqsaty - týys elge alǵys bildirý, qurmet kórsetý, – dedi Damir Marhabatuly.
Volonter Damir Kósheev buǵan deiin Abai Qunanbaevtyń 175 jyldyǵyna orai Almaty qalasynan Jidebai aýylyna deiin 1200 shaqyrym joldy 46 kúnde jaiaý júrip ótken. Sondai-aq, Almatydan Aqtóbe qalasyna velosipedpen 2200 shaqyrym joldy 24 kúnde baǵyndyrǵan.
