Túrkistannyń týrizm salasyndaǵy múmkindikteri túrikterdi tánti etti
Túrkiianyń Antalia qalasynda «XIII Jibek joly elderi qalalarynyń merleri» atty halyqaralyq forýmy ótkizildi. Jibek jolynyń boiynda ornalasqan memleketterdiń týrizm salasyn damytý maqsatynda uiymdastyrylǵan sharaǵa álemniń damyǵan 30 elinen 200-ge jýyq ókil qatysty.
Tórt kúnge sozylǵan jiynda qatysýshylar týrizm salasynyń jahandanýyn, ekonomikalyq áriptestik pen mádeni tájiribe almasýdy nyǵaitý máselelerin keńinen talqylady. Halyqaralyq sharaǵa Qazaqstannyń atynan Túrkistan oblysynyń delegatsiiasy qatysty. Jumysshy topty bastap barǵan tarihshy, ǵalym Sattar Májitov bul forým memleketter arasyndaǵy iskerlik bailanysty ornatýda taptyrmas alań ekenin aita kele, jiynda kóterilgen máselelerdi qoldaitynyn jetkizdi.
Óz kezeginde Antalia qalasynyń meri Menderes Týrel, kóne qalanyń týristik áleýetine qyzyǵýshylyq tanytyp, forýmǵa qatysqan Túrkistan oblysynyń ókilderine alǵysyn bildirdi. Sondai-aq, tarihi-mádeni muralarǵa bai óńirdi damytýǵa Qazaqstan ǵana emes, kúlli túrki álemi nietti ekenin de jetkizdi. Iaǵni, forýmǵa qatysýshylar óńirimizdiń týristik áleýetin joǵary baǵalap, aldaǵy ýaqytta iskerlik qarym-qatynas ornatýǵa daiyn ekenin bildirdi.
Aita keteiik, Túrkistan qalasyna keletin sheteldik qonaqtardyń sany ýaqyt ótken saiyn artyp keledi. Máselen, ótken jyly 1 mln. 160 myń týrist shaharǵa taban tiregen bolsa, biyl 8 aidyń ózinde 900 myńǵa jetken.
Túrkistan oblysy ákiminiń baspasóz qyzmeti
