تۇركيانىڭ انتاليا قالاسىندا «XIII جىبەك جولى ەلدەرى قالالارىنىڭ مەرلەرى» اتتى حالىقارالىق فورۋمى وتكىزىلدى. جىبەك جولىنىڭ بويىندا ورنالاسقان مەملەكەتتەردىڭ تۋريزم سالاسىن دامىتۋ ماقساتىندا ۇيىمداستىرىلعان شاراعا الەمنىڭ دامىعان 30 ەلىنەن 200-گە جۋىق وكىل قاتىستى.
![](/uploads/images/20240127224402619.jpg)
ءتورت كۇنگە سوزىلعان جيىندا قاتىسۋشىلار تۋريزم سالاسىنىڭ جاھاندانۋىن، ەكونوميكالىق ارىپتەستىك پەن مادەني تاجىريبە الماسۋدى نىعايتۋ ماسەلەلەرىن كەڭىنەن تالقىلادى. حالىقارالىق شاراعا قازاقستاننىڭ اتىنان تۇركىستان وبلىسىنىڭ دەلەگاسياسى قاتىستى. جۇمىسشى توپتى باستاپ بارعان تاريحشى، عالىم ساتتار ءماجيتوۆ بۇل فورۋم مەملەكەتتەر اراسىنداعى ىسكەرلىك بايلانىستى ورناتۋدا تاپتىرماس الاڭ ەكەنىن ايتا كەلە، جيىندا كوتەرىلگەن ماسەلەلەردى قولدايتىنىن جەتكىزدى.
ءوز كەزەگىندە انتاليا قالاسىنىڭ مەرى مەندەرەس تۋرەل، كونە قالانىڭ تۋريستىك الەۋەتىنە قىزىعۋشىلىق تانىتىپ، فورۋمعا قاتىسقان تۇركىستان وبلىسىنىڭ وكىلدەرىنە العىسىن ءبىلدىردى. سونداي-اق، تاريحي-مادەني مۇرالارعا باي ءوڭىردى دامىتۋعا قازاقستان عانا ەمەس، كۇللى تۇركى الەمى نيەتتى ەكەنىن دە جەتكىزدى. ياعني، فورۋمعا قاتىسۋشىلار ءوڭىرىمىزدىڭ تۋريستىك الەۋەتىن جوعارى باعالاپ، الداعى ۋاقىتتا ىسكەرلىك قارىم-قاتىناس ورناتۋعا دايىن ەكەنىن ءبىلدىردى.
ايتا كەتەيىك، تۇركىستان قالاسىنا كەلەتىن شەتەلدىك قوناقتاردىڭ سانى ۋاقىت وتكەن سايىن ارتىپ كەلەدى. ماسەلەن، وتكەن جىلى 1 ملن. 160 مىڭ تۋريست شاحارعا تابان تىرەگەن بولسا، بيىل 8 ايدىڭ وزىندە 900 مىڭعا جەتكەن.
تۇركىستان وبلىسى اكىمىنىڭ باسپا ءسوز قىزمەتى