Túrkistan oblysynyń týrizmin damytý sharalary 3 baǵytta júrgiziledi. Olar – tarihi-tanymdyq, emdik-saýyqtyrý jáne ekologiialyq týrizm klasteri. Óńirdiń taýly aimaqta ornalasýy týrizmniń áleýetin arttyrýǵa ekpin beredi. Túrkistan oblysynyń ákimi Darhan Satybaldy týristik áleýetti arttyrý boiynsha naqty tapsyrmalar júktegen bolatyn.
Osyǵan orai, Túrkistan oblysy ákimdiginiń qoldaýymen, oblystyq mádeniet jáne týrizm basqarmasyna qarasty «Open Turkistan» týristik aqparattyq ortalyǵy jáne «Miras Legion» týristik-sporttyq firmasynyń uiymdastyrýymen Sairam-Ógem memlekettik ulttyq tabiǵi parkinde «Túrkistan taýlary» belsendi ekotýristik festivali ótti.
Taý festivalin ótkizýdegi maqsat – erekshe qorǵalatyn aýmaqtar men Túrkistan oblysynyń taýlarynda belsendi ekotýrizmdi damytý, óńirdiń tabiǵatyn nasihattaý, ekologiialyq saýattylyq pen saiahattaý mádenietin kóterý, adamdardy qaýipsizdik erejelerin saqtaýǵa jáne qorshaǵan ortany qorǵaýǵa shaqyrý jáne jańa orta qalyptastyrý.
22-23 shilde kúnderine josparlanǵan aýqymdy sharaǵa 200-dei adam qatysýda. Aldyn ala jariialanǵan habarlandyrýda kórsetilgen sharttardy tolyq oryndaǵan úmitkerler arnaiy baǵdarlama arqyly iriktelip alyndy.
Festivalge qatysýǵa jalpy 2000-nan astam ótinim kelip túsken. Basym bóligi Túrkistan oblysynan jáne Shymkent qalasynan bolǵanymen, elimizdiń ózge de aimaqtarynan belsendilik joǵary boldy. Jas ereksheligi: 18-60 aralyǵy.
Festivaldiń ashylý rásimine Túrkistan oblysy ákiminiń orynbasary Beisen Tájibaev qatysyp, festivaldiń mańyzdylyǵyna toqtaldy. Festival aiasynda oblystyń qurylǵanyna 5 jyl tolýyna orai alpinister taýdyń shyńyn baǵyndyryp, taqtaisha ornatýdy maqsat etip otyr. Bul bastama Túrkistan jurtshylyǵy úshin erekshe oqiǵa bolary sózsiz.
– Túrkistan oblysy týristik áleýetke basymdyq beretin birden-bir óńir. Óńirge byltyr 470 myń, al biyl 6 aida 123 myń týrist kelgen. Oblys aýmaǵynda 4 erekshe qorǵalatyr tabiǵi nysan ornalasqan. Olar – «Aqsý-Jabaǵyly» jáne «Qarataý» qoryqtary, sondai-aq «Sairam – Ógem» ulttyq tabiǵi parki jáne «Syrdariia – Túrkistan» óńirlik tabiǵi parki.
Ekologiialyq týrizmdi damytý maqsatynda infraqurylymdardy jańartý, jóndeý jáne saiahatshylarǵa arnalǵan qonaqjailar salý úshin qajetti jerlerdi bólý jumystaryn belsendi túrde júrgizýdemiz. Bul óz kezeginde ekotýristerdi eselep arttyrady. Jýyrda týrizm salasynyń ókilderimen kezdesip, usynys-pikirlerin tyńdadyq. Onda kóterilgen máseleler saraptaldy. Osylaisha, óńirdiń týrizm salasyn jan-jaqty damytý mindetin birlesip oryndaimyz, – dedi Beisen Dáýletuly.
Baǵdarlama boiynsha oblystyq TJD Tótenshe jaǵdailardy joiý basqarmasynyń bastyǵy, azamattyq qorǵaý polkovnigi Talǵat Dosaliev, Sairam-Ógem memlekettik ulttyq tabiǵi parki, ekologiialyq aǵartý jáne týrizm bóliminiń bastyǵy Qaljigit Qalybaev taý týrizminiń negizderi jáne qaýipsizdik erejeleri týraly, al alǵashqy meditsinalyq kómek kórsetý boiynsha «Qyzyl ai» qoǵamynyń ókilderi sheberlik dáristerin júrgizdi.
Eki kúnge jalǵasqan baǵdarlamanyń birinshi kúninde qatysýshylar «Timbilding», «Shatyrdy qurý», «Talanttar shoýy» sekildi komandalyq jáne shyǵarmashylyq oiyndar men saiystarda baq synasa, gir kóterý, voleibol, badminton, frisbi sporttyq jarystarda básekege tústi. Jyldamdyǵy jáne shapshańdyǵymen úzdik atanǵandar Túrkistan oblysy ákimdiginiń alǵys haty jáne júldelerimen marapataldy.
Keshki baǵdarlamada jastar arasynda tanymal oiyndardan oinatyldy. Ári qarai gitaramen án aitý, bi keshi jáne ashyq aspan astynda kino kórýmen jalǵasty.
Ekinshi kúni marshrýt boiynsha «Býrevestnik» alańyna jaiaý ekskýrsiiasy júrgizilip, taýǵa kóterildi. Uiymdastyrýshylardyń aitýynsha, taý-tasy jáne ózen-kólimen talaidy tamsandyrǵan, Túrkistan óńiriniń tabiǵatyn nasihattaityn mundai festivalder jalǵasyn tabady.
