تۇركىستان وبلىسىنىڭ ءتۋريزمىن دامىتۋ شارالارى 3 باعىتتا جۇرگىزىلەدى. ولار – تاريحي-تانىمدىق، ەمدىك-ساۋىقتىرۋ جانە ەكولوگيالىق تۋريزم كلاستەرى. ءوڭىردىڭ تاۋلى ايماقتا ورنالاسۋى ءتۋريزمنىڭ الەۋەتىن ارتتىرۋعا ەكپىن بەرەدى. تۇركىستان وبلىسىنىڭ اكىمى دارحان ساتىبالدى تۋريستىك الەۋەتتى ارتتىرۋ بويىنشا ناقتى تاپسىرمالار جۇكتەگەن بولاتىن.
وسىعان وراي، تۇركىستان وبلىسى اكىمدىگىنىڭ قولداۋىمەن، وبلىستىق مادەنيەت جانە تۋريزم باسقارماسىنا قاراستى «Open Turkistan» تۋريستىك اقپاراتتىق ورتالىعى جانە «Miras Legion» تۋريستىك-سپورتتىق فيرماسىنىڭ ۇيىمداستىرۋىمەن سايرام-وگەم مەملەكەتتىك ۇلتتىق تابيعي پاركىندە «تۇركىستان تاۋلارى» بەلسەندى ەكوتۋريستىك فەستيۆالى ءوتتى.
تاۋ فەستيۆالىن وتكىزۋدەگى ماقسات – ەرەكشە قورعالاتىن اۋماقتار مەن تۇركىستان وبلىسىنىڭ تاۋلارىندا بەلسەندى ەكوتۋريزمدى دامىتۋ، ءوڭىردىڭ تابيعاتىن ناسيحاتتاۋ، ەكولوگيالىق ساۋاتتىلىق پەن ساياحاتتاۋ مادەنيەتىن كوتەرۋ، ادامداردى قاۋىپسىزدىك ەرەجەلەرىن ساقتاۋعا جانە قورشاعان ورتانى قورعاۋعا شاقىرۋ جانە جاڭا ورتا قالىپتاستىرۋ.
22-23 شىلدە كۇندەرىنە جوسپارلانعان اۋقىمدى شاراعا 200-دەي ادام قاتىسۋدا. الدىن الا جاريالانعان حابارلاندىرۋدا كورسەتىلگەن شارتتاردى تولىق ورىنداعان ۇمىتكەرلەر ارنايى باعدارلاما ارقىلى ىرىكتەلىپ الىندى.
فەستيۆالگە قاتىسۋعا جالپى 2000-نان استام ءوتىنىم كەلىپ تۇسكەن. باسىم بولىگى تۇركىستان وبلىسىنان جانە شىمكەنت قالاسىنان بولعانىمەن، ەلىمىزدىڭ وزگە دە ايماقتارىنان بەلسەندىلىك جوعارى بولدى. جاس ەرەكشەلىگى: 18-60 ارالىعى.
فەستيۆالدىڭ اشىلۋ راسىمىنە تۇركىستان وبلىسى اكىمىنىڭ ورىنباسارى بەيسەن تاجىبايەۆ قاتىسىپ، فەستيۆالدىڭ ماڭىزدىلىعىنا توقتالدى. فەستيۆال اياسىندا وبلىستىڭ قۇرىلعانىنا 5 جىل تولۋىنا وراي الپينيستەر تاۋدىڭ شىڭىن باعىندىرىپ، تاقتايشا ورناتۋدى ماقسات ەتىپ وتىر. بۇل باستاما تۇركىستان جۇرتشىلىعى ءۇشىن ەرەكشە وقيعا بولارى ءسوزسىز.
– تۇركىستان وبلىسى تۋريستىك الەۋەتكە باسىمدىق بەرەتىن بىردەن-بىر ءوڭىر. وڭىرگە بىلتىر 470 مىڭ، ال بيىل 6 ايدا 123 مىڭ تۋريست كەلگەن. وبلىس اۋماعىندا 4 ەرەكشە قورعالاتىر تابيعي نىسان ورنالاسقان. ولار – «اقسۋ-جاباعىلى» جانە «قاراتاۋ» قورىقتارى، سونداي-اق «سايرام – وگەم» ۇلتتىق تابيعي پاركى جانە «سىرداريا – تۇركىستان» وڭىرلىك تابيعي پاركى.
ەكولوگيالىق ءتۋريزمدى دامىتۋ ماقساتىندا ينفراقۇرىلىمداردى جاڭارتۋ، جوندەۋ جانە ساياحاتشىلارعا ارنالعان قوناقجايلار سالۋ ءۇشىن قاجەتتى جەرلەردى ءبولۋ جۇمىستارىن بەلسەندى تۇردە جۇرگىزۋدەمىز. بۇل ءوز كەزەگىندە ەكوتۋريستەردى ەسەلەپ ارتتىرادى. جۋىردا تۋريزم سالاسىنىڭ وكىلدەرىمەن كەزدەسىپ، ۇسىنىس-پىكىرلەرىن تىڭدادىق. وندا كوتەرىلگەن ماسەلەلەر ساراپتالدى. وسىلايشا، ءوڭىردىڭ تۋريزم سالاسىن جان-جاقتى دامىتۋ مىندەتىن بىرلەسىپ ورىندايمىز، – دەدى بەيسەن داۋلەت ۇلى.
قاتىسۋشىلار اراسىندا موبيلوگرافيا بويىنشا بايقاۋ ۇيىمداستىرىلدى. ناتيجەسى 28 شىلدە انىقتالىپ، جەڭىمپازدار تۇركىستان قالاسىندا ارنايى سىيلىقتارمەن ماراپاتتالادى.
باعدارلاما بويىنشا وبلىستىق تجد توتەنشە جاعدايلاردى جويۋ باسقارماسىنىڭ باستىعى، ازاماتتىق قورعاۋ پولكوۆنيگى تالعات دوسالييەۆ، سايرام-وگەم مەملەكەتتىك ۇلتتىق تابيعي پاركى، ەكولوگيالىق اعارتۋ جانە تۋريزم ءبولىمىنىڭ باستىعى قالجىگىت قالىبايەۆ تاۋ ءتۋريزمىنىڭ نەگىزدەرى جانە قاۋىپسىزدىك ەرەجەلەرى تۋرالى، ال العاشقى مەديسينالىق كومەك كورسەتۋ بويىنشا «قىزىل اي» قوعامىنىڭ وكىلدەرى شەبەرلىك دارىستەرىن جۇرگىزدى.
ەكى كۇنگە جالعاسقان باعدارلامانىڭ ءبىرىنشى كۇنىندە قاتىسۋشىلار «تيمبيلدينگ»، «شاتىردى قۇرۋ»، «تالانتتار شوۋى» سەكىلدى كوماندالىق جانە شىعارماشىلىق ويىندار مەن سايىستاردا ب ا ق سىناسا، گىر كوتەرۋ، ۆولەيبول، بادمينتون، فريسبي سپورتتىق جارىستاردا باسەكەگە ءتۇستى. جىلدامدىعى جانە شاپشاڭدىعىمەن ۇزدىك اتانعاندار تۇركىستان وبلىسى اكىمدىگىنىڭ العىس حاتى جانە جۇلدەلەرىمەن ماراپاتالدى.
كەشكى باعدارلامادا جاستار اراسىندا تانىمال ويىنداردان ويناتىلدى. ءارى قاراي گيتارامەن ءان ايتۋ، بي كەشى جانە اشىق اسپان استىندا كينو كورۋمەن جالعاستى.
ەكىنشى كۇنى مارشرۋت بويىنشا «بۋريەۆەستنيك» الاڭىنا جاياۋ ەكسكۋرسياسى جۇرگىزىلىپ، تاۋعا كوتەرىلدى. ۇيىمداستىرۋشىلاردىڭ ايتۋىنشا، تاۋ-تاسى جانە وزەن-كولىمەن تالايدى تامساندىرعان، تۇركىستان ءوڭىرىنىڭ تابيعاتىن ناسيحاتتايتىن مۇنداي فەستيۆالدەر جالعاسىن تابادى.
