Oblys ortalyǵy Óskemenge at basyn tiregen túrkistandyqtardy SHQO Jumyspen qamtýdy úılestirý jáne áleýmettik baǵdarlamalar basshysynyń orynbasary Tımýr Jigitaev qarsy alyp, keleli kezdesý uıymdastyrdy. Jınalǵandar halqy tyǵyz qonystanǵan oblystardan turǵyndary sıregen óńirlerge azamattardy kóptep kóshirý joldaryn talqylady.
Jalpy, «Eńbek» baǵdarlamasy 2015 jyldan beri eńbek kúshi tapshy óńirlerdi jumys kúshimen qamtamasyz etý jáne demografıalyq ósimdi qalpyna keltirý maqsatynda jumyspen qamtýdy jáne jappaı kásipkerlikti damytýǵa baǵyttalǵan baǵdarlama.
Osy oraıda, Qazaqstan Respýblıkasy Úkimetiniń 2016 jylǵy 18 aqpandaǵy №83 qaýlysymen Shyǵys Qazaqstan oblysy oralmandar men qonys aýdarýshylar úshin qonystandyrý óńiri retinde anyqtalǵan bolatyn.
2019 jyly Shyǵys Qazaqstan oblysy boıynsha qonys aýdarýshylar men oralmandardy qabyldaýdyń óńirlik kvotasy 2161 adam (651 otbasy): onyń ishinde qonys aýdarýshylar –1566 adam (456 otbasy), oralmandar – 595 adam (195 otbasy) bekitildi. Baǵdarlamany iske asyrý úshin memlekettik búdjetten jol shyǵyndaryn óteýge 231,9 mln.teńge bólinse úıdi jaldaýǵa 190,9 mln. teńge qarastyrylǵan.
Tabıǵaty kórkem Shyǵys jerine jumys kúshi mol óńirlerden, atap aıtqanda Almaty oblysynan – 426 adam, Túrkistan oblysynan – 168, Qyzylorda oblysynan – 114, Jambyl oblysynan – 90, Mańǵystaý oblysynan – 9, Shymkent qalasynan – 42 jáne Nur-Sultan qalasynan – 1 adam kóship keldi. Túrkistan oblysynan qonys aýdarǵandar basym kópshiligi Altaı, Borodýlıha, Rıdder aýdandaryna tirkelgen.
Bul oblysta memleket tarapynan beriletin materıaldyq kómektiń arqasynda kóship barǵan 99 otbasy óz baspanalaryna ıe bolǵan.
Bıyldyń ózinde eńbek kúshi mol aımaqtardan kóship kelgen 850 adamnyń 374 eńbekke jaramdy, onyń ishinde 288 adam jumysqa ornalastyrylǵan. Sondaı-aq 263 adam turaqty jumys ornymen qamtylsa, jastar praktıkasyna, qoǵamdyq jumystarǵa - 25 adam tartylǵan. Kásipkerlikpen 11 adam aınalysýda.
Sondaı-aq «Serpin» jobasynyń 64 túlegi qonys aýdarǵan.
Túrkistan oblysynan bıyldyń ózinde SHQO-na 54 otbasy, 104 azamat kóship barǵan.
Búgingi tańǵa deıin qonys aýdarǵandardyń basym bóligi turǵyn úımen, jumysqa qabiletti otbasy músheleri jumyspen qamtyldy.Óz kásibin ashamyn deýshilerge egin , mal sharýashylyǵymen shuǵyldanýǵa jer telimderi, bos turǵan ǵımarattar usynyldy. Kóship- qonýǵa baılanysty memleket tarapynan beriletin materıaldyq kómektermen (qarjylaı kómekter) barǵan azamattar qamtamasyz etilýde.
«Nur Otan» partıasy Túrkistan oblystyq fılıalynyń baspasóz qyzmeti
