Túrkistan qalasyndaǵy «Túrkistan Arena» stadionynda «Sport kúni» merekesine orai fýtboldan áýesqoi komandalar arasynda tuńǵysh ret Túrkistan oblysynyń chempionaty ótti.
Chempionat eki kezeńnen turdy. Alǵashqy kezeń aýyldyq okrýgter deńgeiinde ótkizilip, oǵan oblystyń barlyq aýdan-qalalarynan 186 komandadan 3300-ge jýyq fýtbolshy qatysty. Irikteý kezeńinen súrinbei ótken úzdikter ekinshi ainalymǵa joldama aldy. Munda 3 qala men 14 aýdannyń quramalary tórt aimaqqa bólinip, finaldyq kezeńge beriletin joldama úshin baq synady.
Finalǵa Maqtaaral, Qazyǵurt, Ordabasy aýdandary men Túrkistan qalasynyń komandalary shyqty. 19-21 tamyz kúnderi ótken sheshýshi oiyndardyń qorytyndysy boiynsha 1-oryndy Maqtaaral aýdanynyń komandasy jeńip alsa, 2-oryn Túrkistan qalasynyń fýtbolshylaryna buiyrdy. Al Ordabasy aýdanynyń quramasy 3-orynǵa turaqtady.
Jeńimpaz atanǵan Maqtaaral komandasy Qazaqstan Respýblikasynyń kýbogyna joldama alyp, oblys namysyn qorǵaý múmkindigine ie boldy.
Chempionattyń jabylý saltanatynda Túrkistan oblysynyń ákimi Nuralhan Kósherov sportshylardy kásibi merekesimen quttyqtap, olarǵa medaldar men kýboktar tabystady.
– Bul mereke – kásibi sportshylar men bapkerlerge ǵana emes, barlyq sport jankúierleri men salaýatty ómir saltyn ustanatyn árbir adam úshin aitýly kún. Túrkistan óńiri – árqashan qazaq sportyna serpin bergen qasietti aimaq. Biz jastarǵa qoldaý kórsetý arqyly el bolashaǵyn nyǵaitamyz, – dedi oblys ákimi.
– Bizdiń óńirimizden Olimpiada jeńimpazdary men júldegerleri Bekzat Sattarhanov, Muhtarhan Dildábekov, Sáken Bibosynov, Jazira Japparqul siiaqty esimderi álemge tanymal sportshylar shyqqan. KSRO-nyń eńbek sińirgen sport sheberi Ábdisalan Nurmahanov, Oktiabr Jarylqapov, Sabyr Rahimov, Haiys Aqqaliev sekildi dańqty tulǵalar búkil halyqqa sportpen shuǵyldanýǵa úlgi bola bildi. Aitýly tulǵalardyń izin jalǵaǵan sportshylarymyz ósip keledi. Ulttyq sport túrlerinen de oblysymyzdyń sportshylary Kóshpendiler oiyndarynda 31 medal ielenip, respýblika boiynsha kósh bastady. Jyl basynan beri sportshylarymyz Álem, Aziia jáne Qazaqstan chempionattarynda jalpy 1 122 medaldy jeńip aldy. Ulttyq qurama sapyna oblystan 766 sportshy endi. Bul kórsetkish ótken jylmen salystyrǵanda 150 sportshyǵa artyp otyr, – dedi Nuralhan Kósherov.
Búginde oblysta 92 148 adam sportpen júieli túrde ainalysady, olarǵa 2 440 jattyqtyrýshy qyzmet kórsetýde.
Sporttyq infraqurylym da qarqyndy damýda. Túrkistanda «Túrkistan Arena», halyqaralyq tennis ortalyǵy,«Muz saraiy» jáne Bekzat Sattarhanov atyndaǵy sport kesheni paidalanýǵa berilgen. Óńirde taǵy 54 jańa sport nysanyn salý josparlanyp otyr, onyń ishinde halyqaralyq eskek esý arnasy men atshabar da bar.
Bul chempionat – tek jarys emes, jastardyń sportqa degen qyzyǵýshylyǵyn arttyryp, jańa esimderdiń ashylýyna múmkindik bergen mańyzdy oqiǵa boldy. Oblys basshylyǵy aldaǵy ýaqytta da osyndai jarystardy turaqty ótkizip turýdy josparlap otyr.
