تۇركىستان قالاسىنداعى «تۇركىستان ارەنا» ستاديونىندا «سپورت كۇنى» مەرەكەسىنە وراي فۋتبولدان اۋەسقوي كوماندالار اراسىندا تۇڭعىش رەت تۇركىستان وبلىسىنىڭ چەمپيوناتى ءوتتى.
چەمپيونات ەكى كەزەڭنەن تۇردى. العاشقى كەزەڭ اۋىلدىق وكرۋگتەر دەڭگەيىندە وتكىزىلىپ، وعان وبلىستىڭ بارلىق اۋدان-قالالارىنان 186 كوماندادان 3300-گە جۋىق فۋتبولشى قاتىستى. ىرىكتەۋ كەزەڭىنەن سۇرىنبەي وتكەن ۇزدىكتەر ەكىنشى اينالىمعا جولداما الدى. مۇندا 3 قالا مەن 14 اۋداننىڭ قۇرامالارى ءتورت ايماققا ءبولىنىپ، فينالدىق كەزەڭگە بەرىلەتىن جولداما ءۇشىن ب ا ق سىنادى.
فينالعا ماقتاارال، قازىعۇرت، ورداباسى اۋداندارى مەن تۇركىستان قالاسىنىڭ كوماندالارى شىقتى. 19-21 تامىز كۇندەرى وتكەن شەشۋشى ويىنداردىڭ قورىتىندىسى بويىنشا 1-ورىندى ماقتاارال اۋدانىنىڭ كومانداسى جەڭىپ السا، 2-ورىن تۇركىستان قالاسىنىڭ فۋتبولشىلارىنا بۇيىردى. ال ورداباسى اۋدانىنىڭ قۇراماسى 3-ورىنعا تۇراقتادى.
جەڭىمپاز اتانعان ماقتاارال كومانداسى قازاقستان رەسپۋبليكاسىنىڭ كۋبوگىنا جولداما الىپ، وبلىس نامىسىن قورعاۋ مۇمكىندىگىنە يە بولدى.
چەمپيوناتتىڭ جابىلۋ سالتاناتىندا تۇركىستان وبلىسىنىڭ اكىمى نۇرالحان كوشەروۆ سپورتشىلاردى كاسىبي مەرەكەسىمەن قۇتتىقتاپ، ولارعا مەدالدار مەن كۋبوكتار تابىستادى.
– بۇل مەرەكە – كاسىبي سپورتشىلار مەن باپكەرلەرگە عانا ەمەس، بارلىق سپورت جانكۇيەرلەرى مەن سالاۋاتتى ءومىر سالتىن ۇستاناتىن ءاربىر ادام ءۇشىن ايتۋلى كۇن. تۇركىستان ءوڭىرى – ءارقاشان قازاق سپورتىنا سەرپىن بەرگەن قاسيەتتى ايماق. ءبىز جاستارعا قولداۋ كورسەتۋ ارقىلى ەل بولاشاعىن نىعايتامىز، – دەدى وبلىس اكىمى.
سونداي-اق ول حالىقارالىق جانە رەسپۋبليكالىق جارىستاردا توپ جارعان سپورتشىلاردى جەكە ماراپاتتاپ، ءوڭىر سپورتىنىڭ جەتىستىكتەرىنە توقتالدى.
– ءبىزدىڭ وڭىرىمىزدەن وليمپيادا جەڭىمپازدارى مەن جۇلدەگەرلەرى بەكزات ساتتارحانوۆ، مۇحتارحان دىلدابەكوۆ، ساكەن بيبوسىنوۆ، جازيرا جاپپارقۇل سياقتى ەسىمدەرى الەمگە تانىمال سپورتشىلار شىققان. كسرو-نىڭ ەڭبەك سىڭىرگەن سپورت شەبەرى ءابدىسالان نۇرماحانوۆ، وكتيابر جارىلقاپوۆ، سابىر راحيموۆ، حايىس اققالييەۆ سەكىلدى داڭقتى تۇلعالار بۇكىل حالىققا سپورتپەن شۇعىلدانۋعا ۇلگى بولا ءبىلدى. ايتۋلى تۇلعالاردىڭ ءىزىن جالعاعان سپورتشىلارىمىز ءوسىپ كەلەدى. ۇلتتىق سپورت تۇرلەرىنەن دە وبلىسىمىزدىڭ سپورتشىلارى كوشپەندىلەر ويىندارىندا 31 مەدال يەلەنىپ، رەسپۋبليكا بويىنشا كوش باستادى. جىل باسىنان بەرى سپورتشىلارىمىز الەم، ازيا جانە قازاقستان چەمپيوناتتارىندا جالپى 1 122 مەدالدى جەڭىپ الدى. ۇلتتىق قۇراما ساپىنا وبلىستان 766 سپورتشى ەندى. بۇل كورسەتكىش وتكەن جىلمەن سالىستىرعاندا 150 سپورتشىعا ارتىپ وتىر، – دەدى نۇرالحان كوشەروۆ.
بۇگىندە وبلىستا 92 148 ادام سپورتپەن جۇيەلى تۇردە اينالىسادى، ولارعا 2 440 جاتتىقتىرۋشى قىزمەت كورسەتۋدە.
سپورتتىق ينفراقۇرىلىم دا قارقىندى دامۋدا. تۇركىستاندا «تۇركىستان ارەنا»، حالىقارالىق تەننيس ورتالىعى،«مۇز سارايى» جانە بەكزات ساتتارحانوۆ اتىنداعى سپورت كەشەنى پايدالانۋعا بەرىلگەن. وڭىردە تاعى 54 جاڭا سپورت نىسانىن سالۋ جوسپارلانىپ وتىر، ونىڭ ىشىندە حالىقارالىق ەسكەك ەسۋ ارناسى مەن اتشابار دا بار.
بۇل چەمپيونات – تەك جارىس ەمەس، جاستاردىڭ سپورتقا دەگەن قىزىعۋشىلىعىن ارتتىرىپ، جاڭا ەسىمدەردىڭ اشىلۋىنا مۇمكىندىك بەرگەن ماڭىزدى وقيعا بولدى. وبلىس باسشىلىعى الداعى ۋاقىتتا دا وسىنداي جارىستاردى تۇراقتى وتكىزىپ تۇرۋدى جوسپارلاپ وتىر.
