Túrkistan oblysynyń Tótenshe jaǵdaılar departamentiniń qutqarýshylar toby elimizdiń Soltústik óńirlerine kómektesý úshin jolǵa shyqqan bolatyn. Atap aıtsaq, Túrkistan óńirinen 54 qutqarýshy, 14 tehnıka jiberildi, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Túrkistandyq qutqarýshylar ózderimen birge ala shyqqan 15 motopompa, 2 qaıyq, 16 portatıvti radıostansıa, 2 spýtnıktik telefon, 5 shatyr, 50 tósek avtonomdy jumys isteýge tolyq daıyn. Olar sý tasqynynan zardap shekken óńirlerge kómek qolyn sozdy.

Búgin qutqarýshylar Soltústik Qazaqstan oblysyna baryp, qarǵyn sýdyń aldyn alý jumystaryna kirisip ketti.

Kásibı mamandardan quralǵan top tasqyn qaýpi joǵary Ǵabıt Músirepov, Aıyrtaý, Taıynsha jáne Tımırázev aýdandarynda jumys júrgizedi dep josparlanǵan. Qazirgi tańda qutqarýshylar sý taqynynyń aldyn alý jáne baqylaý jumystaryn atqaryp jatyr.

Aıta keteıik, buǵan deıin Túrkistan óńirinen Aqtóbe oblysyna gýmanıtarlyq kómek jáne eriktiler toby jiberilgen bolatyn.