Sońǵy jyldary elimizde túrli jaǵdaida gaz ben tútinnen ýlaný oqiǵasy jiilegen. Osyndai jaǵdaiǵa jol bermeý maqsatynda Lengir qalasyndaǵy №1 mektep-gimnaziianyń 7-synyp oqýshylary Ersat Ánýar men Álǵani Seraly informatika pániniń muǵalimi, pedagog-sarapshy Saltanat Uiatbaevanyń jetekshiligimen gaz ben tútinnen ýlanýdan saqtandyratyn qurylǵy oilap taptyp, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Qazirgi kez – tsifrly tehnologiia zamany. Atalmysh tehnologiia múmkindikterin adam igiligine paidalana otyryp, gaz ben tútinnen ýlaný oqiǵalaryn boldyrmaý kerek. Osy maqsatta biz gazdan, tútinnen ýlanýdan saqtandyratyn qurylǵy jasadyq.
Balalar úide jalǵyz qalǵan jaǵdaida gazdan aqaý nemese tútin shyqsa, qurylǵy dabyl qaǵady. Keiin ata-ananyń mobildi telefonyna qaýipti eskertetin sms habarlama joldanady. Osylaisha, qaiǵyly jaǵdaidyń aldyn alýǵa bolady, – deidi Ersat pen Álǵani.
Álgindei qaýiptiń aldyn alatyn jańa qurylǵyǵa tótenshe jaǵdai mamandary da qyzyǵýshylyq tanytqan. Olar «Bul qurylǵyny gazdyń syrtqa ketýin anyqtaýda, órt sóndirý júielerinde, iaǵni adamdar qaýipsizdigin qamtamasyz etýde paidalanǵan tiimdi» degen pikirde.
Jas ónertapqyshtardyń «Gaz ben tútinnen ýlanýdan saqtandyratyn qurylǵy» jobasy oqýshylardyń zertteý jobalary men shyǵarmashylyq jumystaryna arnalǵan respýblikalyq «Zerde» konkýrsynyń oblystyq kezeńinde robototehnika sektsiiasy boiynsha I oryndy jeńip alyp, respýblikalyq kezeńge joldama berilgen.
