Oqýshylardyń kúzgi kanıkýlyn tanymdyq is-áreketpen qyzyqty ótkizsek degen maqsatpen Túrkistan qalasyndaǵy № 21 jalpy orta mekteptiń qazaq tili men ádebıeti pániniń muǵalimi Jaqsygúl Súleımenova ózi uıymdastyrǵan «Abaı álemi» klýbynyń 8-10 synypta oqıtyn bir top múshelerin Almaty qalasyna bastap keldi.

Almatymen alǵashqy tanystyqty Abaı atyndaǵy Qazaq ulttyq pedagogıkalyq ýnıversıtetindegi «Abaıtaný» mýzeı-kabınetin aralaýmen bastady.

«Abaıtaný» mýzeı-kabınetimen oqýshylardy ýnıversıtettegi «Hákim Abaı» ǵylymı-zertteý ortalyǵynyń dırektory Jabal Shoıynbet tanystyryp, oqýshylarǵa Abaı murasynyń tanymdyq qyry men syryna toqtalyp Hákim Abaı danalyǵymen sýsyndatty. Bilýge, bilimge qushtar túrkistandyq jas órenderge ortalyq dırektory J.Shoıynbet ataqty abaıtanýshy Mekemtas Myrzahmetulynyń ýnıversıtettiń «Ulaǵat» baspasynan shyqqan «Abaı luǵaty» kitabyn syıǵa tartsa, top jetekshisi J.Súleımenova mektepterindegi Abaıǵa arnaıy arnaǵan «Shamshyraq» qoljazba gazeti men tós belgisin syılady.

Abaı atalarynyń danalyǵyna qanyǵa túsken bilim men óner qýǵan oqýshylar Almaty qalasyndaǵy Ult-aspaptar murajaıyna bet aldy...