وقۋشىلاردىڭ كۇزگى كانيكۋلىن تانىمدىق ىس-ارەكەتپەن قىزىقتى وتكىزسەك دەگەن ماقساتپەن تۇركىستان قالاسىنداعى № 21 جالپى ورتا مەكتەپتىڭ قازاق ءتىلى مەن ادەبيەتى ءپانىنىڭ ءمۇعالىمى جاقسىگۇل سۇلەيمەنوۆا ءوزى ۇيىمداستىرعان «اباي الەمى» كلۋبىنىڭ 8-10 سىنىپتا وقيتىن ءبىر توپ مۇشەلەرىن الماتى قالاسىنا باستاپ كەلدى.

الماتىمەن العاشقى تانىستىقتى اباي اتىنداعى قازاق ۇلتتىق پەداگوگيكالىق ۋنيۆەرسيتەتىندەگى «ابايتانۋ» مۋزەي-كابينەتىن ارالاۋمەن باستادى.

«ابايتانۋ» مۋزەي-كابينەتىمەن وقۋشىلاردى ۋنيۆەرسيتەتتەگى «حاكىم اباي» عىلىمي-زەرتتەۋ ورتالىعىنىڭ ديرەكتورى جابال شويىنبەت تانىستىرىپ، وقۋشىلارعا اباي مۇراسىنىڭ تانىمدىق قىرى مەن سىرىنا توقتالىپ حاكىم اباي دانالىعىمەن سۋسىنداتتى. بىلۋگە، بىلىمگە قۇشتار تۇركىستاندىق جاس ورەندەرگە ورتالىق ديرەكتورى ج.شويىنبەت اتاقتى ابايتانۋشى مەكەمتاس مىرزاحمەت ۇلىنىڭ ۋنيۆەرسيتەتتىڭ «ۇلاعات» باسپاسىنان شىققان «اباي لۇعاتى» كىتابىن سىيعا تارتسا، توپ جەتەكشىسى ج.سۇلەيمەنوۆا مەكتەپتەرىندەگى ابايعا ارنايى ارناعان «شامشىراق» قولجازبا گازەتى مەن ءتوس بەلگىسىن سىيلادى.

اباي اتالارىنىڭ دانالىعىنا قانىعا تۇسكەن ءبىلىم مەن ونەر قۋعان وقۋشىلار الماتى قالاسىنداعى ۇلت-اسپاپتار مۇراجايىنا بەت الدى...